नेकपा (एकीकृत समाजवादी)का महासचिव घनश्याम भुसालले पार्टीको महाधिवेशनपछि नेपालका कम्युनिस्ट पार्टीहरूभित्र सैद्धातिक र वैचारिक दुवै किसिमको भुइँचालो जाने दाबी गरेका छन् । 

एकीकृत समाजवादी रुपन्देहीले शुक्रबार भैरहवामा आयोजना गरेको प्रशिक्षण कार्यक्रमलाई सम्बोधन गर्दै महासचिव भुसालले आगामी असार १६ देखि २० गतेसम्म काठमाडौंमा हुने महाधिवेशनले भुइँचालोका रुपमा ऐजन्डा ल्याउने बताए । ‘जसरी एउटा ठूलो भुइँचालोपछि नयाँ शहरहरू सिर्जना हुन्छन् । त्यसैगरी नेपालको कम्युनिस्ट आन्दोलन पनि नयाँ तरिकाले अगाडि बढ्नेछ,’ उनले भने । 

महासचिव भुसालले महाविधेशनपछि नेपालका कम्युनिस्ट पार्टीहरूलाई ध्रुवीकृत गराउनेसमेत बताए । उनले नेपालको कम्युनिस्ट आन्दोलनले समाजवादी कार्यक्रम ल्याउन नसकेको बताउँदै विचार, सिद्धान्त र कार्यक्रमले आफूहरू ठीक ठाउँमा रहेको बताए । ‘छोड्दिनुस् जति हन्डर खाइयो, खाइयो,’ कार्यकर्तालाई आश्वस्त पार्दै भुसालले भने, ‘खानेजति धक्का खाइयो, अब कार्यक्रम, संगठन र विचारका हिसाबले मजबुद दस्तावेज ल्याउँछौं ।’ उनले एकीकृत समाजवादीले धक्का खाने ठाउँ पनि अब नरहेकाले एजेन्डाबाटै विचारको नेतृत्व गरिने बताए । उनले नेकपा (एमाले) आफूहरूले बनाएको पार्टी भएको भन्दै त्यसका अध्यक्ष केपी शर्मा ओली सुध्रिएको हो कि भन्ने लागेको बताए ।

महासचिव भुसालले प्रधानमन्त्री पुष्पकमल दाहाल प्रचण्ड र एमाले अध्यक्ष ओली दुवै थाकेर बनेको गठबन्धनमा आफूहरू पनि सहभागी बनेको बताए । ‘प्रचण्डजी कांग्रेससँग लडेर थाक्नुभयो, एमाले अध्यक्ष ओलीजी पार्टीभित्रको अन्तरविरोध र प्रश्नले थाकेपछि गठबन्धन बनेको हो,’ उनले भने, ‘यो कति लामो समय जान्छ, त्यो ओलीजीको व्यवहारमा भर पर्छ ।’

पूर्वमन्त्रीसमेत रहेका भुसालले गठबन्धन ओलीकै कारण खतरामा रहेको पनि संकेत गरे । सुदूरपश्चिम प्रदेशमा एकीकृत समाजवादीका मुख्यमन्त्रीलाई विश्वासको मत दिन हिच्किचाएकोतर्फ संकेत गर्दै उनले सहमति चँुडिनेगरी नतान्न आग्रह गरे । ‘गरिएको सम्झौता उल्ल्घन गर्ने, सहमति उल्लंघन गर्ने । यो एमालेको नेतृत्वमा ओलीजी आएदेखि नै भइरहेको छ । उहाँ हुँदा अलिअलि हुने कुरा हामीलाई थाहा भएकै हो,’ उनले भने, ‘त्यो चुँडिनेगरी नतान्नुस् अन्यथा क्षति हुनेछ ।’ उनले विगतमा नेपाली कांग्रेससँगको गठबन्धनमा आफूहरूको भूमिका हस्तक्षेपकारी नभएको बताउँदै अहिले भने झगडा गर्ने अवस्थामा आइपुगेको बताए ।

त्यस्तै पार्टीका सचिव तथा लुम्बिनी प्रदेश इन्चार्ज हरि पराजुलीले आफूहरू जनताको पक्षमा काम गर्नका लागि विद्रोह गरेर मैदानमा होमिएको बताए । उनले एमालेलाई शक्तिशाली बनाउन विगतमा मेहनत गरेपनि पार्टीले वाचा पूरा नगरेपछि विद्रोह गरिएको बताए । उनले जनताका समस्या समाधान गर्नका लागि नै एकीकृत समाजवादी बनाइएको दाबी गरे ।

एकीकृत समाजवादी लुम्बिनी प्रदेश अध्यक्ष तथा पूर्वमन्त्री सोमप्रसाद पाण्डेले आफूहरूकै कारण संविधानको रक्षा भएको बताए । उनले एमालेबाट विद्रोह गरेर आफूहरूले संविधान बचाएको दाबी पनि गरे ।