काठमाडौं, २८ मंसिर — आधुनिक जीवनमा कामको दबाब र तनावका कारण मानिसको जीवनमा प्रेम कम भइरहेको छ । यसले गर्दा परिवारमा दूरी बढ्दै गएको छ । 

तर अब वैज्ञानिकहरूले यसको समाधान निकालेका छन् । अनुसन्धानकर्ताहरूले मानव शरीरमा पाइने लभ हर्मोन अक्सिटोक्सिनको कृत्रिम संस्करण तयार पारेका छन् । यसको कुनै साइड इफेक्ट हुँदैन । 

अस्ट्रेलियाको क्वीन्सल्यान्ड विश्वविद्यालयका मार्कस मुटेनथेलरले भने, ‘अक्सिटक्सिनको नकारात्मक पक्ष भनेको यसले एकैचोटि सबै रिसेप्टरलाई सक्रिय गरिदिन्छ र धेरै साइड इफेक्ट हुन्छ । तर अनुसन्धानकर्ताहरूले अक्सिटक्सिनको संरचनामा ससानो परिवर्तन गरेर एक नयाँ अणु विकसित गरेका छन् जसले रिसेप्टरको सक्रियता कम गर्छ ।’

जर्नल साइन्स सिगनलिङमा अनुसन्धानकर्ताहरूले लेखेअनुसार, अटिजम, माइग्रेन, स्किजोफ्रेनिया र तनाव जस्ता मानसिक रोगको उपचारमा अक्सिटक्सिन प्रयोग गरिन्छ ।

मुटेनथेलर भन्छन्, ‘यो नयाँ यौगिक पदार्थले भविष्यमा गरिने उपचारमा सहयोग गर्नुका अलावा चिन्ता, आत्मकेन्द्री भावना र सामाजिक डरलाई पनि रोक्छ ।’

एजेन्सी