काठमाडौं, ३० पुस– अन्य दिन अस्पतालमा आउँने विरामीको हेरचाहमा व्यस्त रहने वीर अस्पतालका नर्सहरु आइतवार बिहान १० बजेको समयमा अस्पताल परिसरमा उभिएका थिए । नर्सहरु आफ्नो काम छोडेर हातमा कालो पट्टि बाँधेर अस्पतालको परिसरमा एकै ठाउँमा जम्मा भएर बसेका थिए  ।

शनिबार अस्पतालको ओपिडि सेवा बन्द हुने भएकाले अन्य दिनको तुलनमा आइतबार अस्पताल परिसरमा विरामीको चाप बढि नै देखिन्थ्यो । अस्पतालमा आएका विरामीहरु पनि अनौठो मानेर हातमा कालोपट्टी बाधेर अस्पताल बाहिर उभिएका नर्सहरुलाई हेर्दै थिए । 

आइतबार विहान साढे १० बजे वीर अस्पतालका नर्सहरु काम छोडेर आन्दोलनमा उत्रिएका थिए । नेपाल नर्सिङ संघकोको अगुवाइमा विभिन्न माग राख्दै देशभरका आफुहरुले बुधबारदेखि नै हातमा कालोपट्टी बाँधेर सेवा दिएको र शुक्रबार बाट एक घण्टा काम छोडेको वीर अस्पताल नर्सिङ कर्मचारी एवं नेपाल नर्सिङ संघकी महासचिब लक्ष्मी केसीले बताइन् । 

सरकारले आफ्नो मागहरुलाई वेवास्ता गरेकाले आफुहरु बाहिर निश्किेर आन्दोलन गर्न बाध्य भएको उनले बताइन । ‘मानव अंग प्रत्यारोपण केन्द्रबाट निष्काशन गरिएका नर्सिङ कर्मचारीहरुलाई बिनासर्त अविलम्ब पुनर्बहाली गर्नुपर्ने हाम्रो प्रमुख माग हो’ लोकान्तरसँग भनिन् । 

वीर अस्पताल जस्तै देशभरका अस्पतालमा कार्यरत नर्सिङ कर्मचारीहरुले शुक्रबार देखी एक घण्टा काम छाडेर आन्दोलमा उत्रिएका छन् ।  

यस्ता छन् आन्दोलनरत नर्सहरुको लिखित माग ११ बुँदे मागहरु

• मानव अंग प्रत्यारोपण केन्द्रबाट निष्कासन गरिएका नर्सिङ कर्मचारीहरुलाई बिनासर्त अविलम्ब पुनर्बहाली गरियोस् ।
• अधिकारसहितको नर्सिङ सेवा महाशाखा पुनर्स्थापना गरियोस् ।
•  जनतालाई गुणस्तरीय नर्सिङ सेवा दिनका लागि नेपाल सरकारले बनाएको ’नर्स बिरामीको अनुपात’ सबै अस्पतालमा यथाशीघ्र लागू गरियोस् ।
•  नेपाल सरकारका नर्सहरुलाई उपलब्ध गराइरहेको न्यूनतम तलबभत्ता सरह विभिन्न निजी स्वास्थ्य संस्थामा कार्यरत नर्सलाई पनि तहगत हिसाबबाट उपलब्ध गराइयोस् ।
•  भोलेन्टियरका नाममा भएको नर्सको श्रमशोषण बन्द गरियोस्।
• सार्वजनिक, निजी र साझेदारी क्षेत्रको सहकार्यलाई प्रवर्धन गरी स्कुल तथा उद्योगहरुमा गुणस्तरीय नर्सिङ सेवा पुर्यामउने व्यवस्था गरियोस् ।
•  सरकारी तथा निजी क्षेत्रमा कार्यरत नर्सहरुलाई लुगा भत्ता, रात्रिकालीन भत्ता, बिदा सुविधा र जोखिम भत्ता गरी सोही अनुरुप निजी स्वास्थ्य संस्थामा पनि सोही अनुपातमा लागू गरियोस् ।
•  दुर्गममा काम गर्ने नर्सहरुलाई उचित पारिश्रमिक र सुरक्षाको प्रत्याभूति गरियोस् ।
• योग्यता पुगेका नर्सिङ कर्मचारीलाई वृत्ति विकासका लागि प्रस्ट खाका तयार गरियोस् ।
•  योग्यता पुगेका अनमीलाई स्टाफ नर्स, स्टाफ नर्सलाई ब्याचलर नर्सिङ, ब्याचलर नर्सिङलाई मास्टर नर्सिङ र मास्टर  नर्सिङलाई पिएचडीसम्म तलबी अध्ययन बिदाको व्यवस्था गरियोस् ।
•  श्रम ऐन, २०७४ सबै स्वास्थ्य क्षेत्रमा यथाशिघ्र लागू गरियोस् । 

सरकारले वार्ता नगरेसम्म आन्दोलन जारी रहने

स्वास्थ्य मन्त्रालयमा आफ्ना मागहरु पटक पटक पेस गरेको भएपनि सुनुवाई नभएपछि आन्दोलनमा उत्रिएको केसीले बताइन् । आफ्ना मागहरुको सुनुवाइ नभएसम्म आन्दोलन जारी रहने केसीको भनाइ छ ।

 ‘हामी नर्सको पिडा र समस्यालाई चासो नराखेकोले हामीले आन्दोल गर्न बाध्य भएका हौं । हाम्रो माग प्रति सकारात्मक भएर हाम्रो समस्या समाधानको लागि सरकाले वार्तामा नबोलाएसम्म हाम्रा आन्दोलनका कार्यक्रम जारी रहन्छ ।’ उनले लोकान्तरसँग भनिन् ।

नर्सहरुले आफ्ना मागहरु  पूरा नभए माघ १, २ र ३ गते  ३ घन्टा  काम नगर्ने, ४, ५ र ६ गते सबै अस्पताल र शैक्षिक संस्थामा ८ देखि ४ बजेको सिफ्टमै ड्युटी नजाने र माघ ७ गते २४ घन्टा नै ड्युटी छाडेर स्वास्थ्य मन्त्रालयमा धर्ना दिर्ने  चेतावनी दिएका छन् ।