काठमाडौं ४ माघ– नेकपा एमालेकी बैकल्पिक केन्द्रीय सदस्य शान्ता चौधरीले देशकै राजधानी बनाउन लायक ठाउँ दाङलाई प्रदेशको राजधानी नबनाईनुको कारण सरकारसँग माग गरेकी छिन् । 

‘प्रदेशको राजधानी हुनुपर्ने दाङ नै हो । हरेक दृष्टिले दाङ नै उपयुक्त हो । यो मन्त्रिमण्डलमा बस्नेहरुको दिमागले काम गर्न छाडेको हुनाले दाङलाई राजधानी नबनाईएको हुनुपर्छ’ शान्ताले सामाजिक सञ्जाल फेसबुक मार्फत सरकारलाई प्रश्न गरेकी छिन, ‘देशकै राजधानी बनाउन लायक ठाउँलाई प्रदेशको राजधानी नबनाईनुको कारण के हो ?’

भक्तपुर निवासरी नेपाल मजदुर किसान पार्टीका अध्यक्ष नारायणमान विजुक्छेले धेरै वर्ष अघि देखि देशको राजधानी दाङ हुनुपर्छ भन्दै आएको स्मरणगर्दै चौधरीले दाङलाई राजधानी नबनाइनुको जवाफ दिनुपर्ने बताइन । 

‘गल्ती हुनसक्छ । गल्ती हुनुलाई ठूलो कुरा नमानौं । गल्ती सच्याइनुपर्छ । तत्काल यो गल्ती सच्याइयोस् । दाङलाई प्रादेशिक राजधानी बनाइयोस्’ चौधरीले लेखेकी छिन, ‘जनताको व्यापक एकताले मात्र दाङलाई राजधानी बनाउन सकिन्छ । यसका लागि हामीले सरकारलाई निरन्तर दवाब दिनुपर्छ । तर, हाम्रो दवाब अत्यन्त शान्तिपूर्ण र रचनात्मक हुनुपर्छ । आन्दोलन गरेर सरकारलाई दवाब दिउँ तर आन्दोलनको बहानामा हिंसा र अशान्ति नगरौं । आन्दोलनको नाममा सुन्दर दाङलाई तहसनहस नपारौं ।’ 

एमालेको तर्फबाट समानुपातिक सांसदकी उम्मेदवार चौधरीले दाङका जनताको व्यापक एकता र प्रदेशका जनताहरुको व्यापक समर्थनमा दाङलाई हामी राजधानी बनाएरै छाड्ने बताएकी छिन् ।