काठमाडौं, ६ माघ– सातवटै प्रदेशका प्रदेश प्रमुखले पद तथा गोपनीयताको शपथ लिएका छन् । राष्ट्रपति कार्यलय शीतलनिवासमा शुक्रबार एक कार्यक्रमकाबीच राष्ट्रपति विद्यादेवी भण्डारीले उनीहरुलाई शपथ गराएकी हुन् । प्रदेश प्रमुखले शपथ लिएसँगै निर्वाचन आयोगलाई राष्ट्रियसभा सदस्य निर्वाचनको तयारीका लागि सहज भएको छ ।
आयोगले शुक्रबार नै प्रदेश प्रमुखहरुलाई प्रदेशसभा सदस्यहरुको सूची बुझाएको छ । अब प्रदेश प्रमुखहरुले प्रदेशसभा सदस्यहरुलाई शपथ खुवाउनेछन् । प्रदेश सभा सदस्यहरुको शपथ आइतबारका लागि तोकिएको छ । 

प्रमाणपत्र प्रदान– निर्वाचन आयोगले समानुपातिक निर्वाचन प्रणालीतर्फबाट प्रदेशसभा सदस्यमा निर्वाचित सदस्यहरुलाई निर्वाचित भएको प्रमाणपत्र प्रदान गरेको छ । आयोगको कार्यलयमा शुक्रबार आयोजित कार्यक्रममा प्रमुख निर्वाचन आयुक्त डा अयोधिप्रसाद यादवले निर्वाचित भएको प्रमाणपत्र प्रदान गरे । 
समानुपातिक निर्वाचन प्रणालीबाट प्रदेशसभा सदस्यमा ४८ पुरुष र १७२ महिला गरी २२० जना निर्वाचित भएका छन् । 
यसैबीच, निर्वाचन आयोगले राष्ट्रियसभा सदस्य निर्वाचनका लागि दर्ता भएका २१ वटा दललाई चुनाव चिह्न प्रदान गरेको छ । राष्ट्रियसभा सदस्यको निर्वाचन यही माघ २४ गते हुँदैछ । यता आयोगले निर्वाचनको अनुकल वातावरण बनाउन आग्रह गरेको छ । 

ओली प्रचण्ड वार्ता– नेकपा एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल  प्रचण्डबीच शुक्रबार तीन घण्टा ‘वान टु वान’ वार्ता भएको छ । दुई नेताबीच कार्यदलको रिपोर्ट, प्रदेश सरकारको गठन र राष्ट्रिय सभा निर्वाचनको विषयमा छलफल भएको प्रचण्डका प्रेस संयोजक मनहरी तिमिल्सिनाले जानकारी दिए । 
ओली र प्रचण्डबीच शनिबार थप गृहकार्य गरेर आइतबार एकता संयोजन समितिको बैठक बसेर छिट्टै पार्टी एकता टुङ्गाउने सहमति भएको छ । राष्ट्रियसभा सदस्य निर्वाचनमा एमालेका २९ र माओवादीका १४ उम्मेदवार उठाउने उनीहरुको तयारी छ । 

कांग्रेसको निर्णय– नेपाली कांग्रेसले पार्टीमा महत्वपूर्ण योगदान दिएका व्यक्तिलाई राष्ट्रियसभाको उम्मेदवार बनाउने निर्णय गरेको छ । केन्द्रीय कार्यसमितिको बैठकले उम्मेदवार चयनका लागि केन्द्रीय कार्य समितिमा आएका सुझावलाई ध्यानमा राखी पार्टीमा महत्वपूर्ण योगदान दिएकालाई उम्मेदवार बनाउने निर्णय गरेको हो । 
आगामी केन्द्रीय कार्य समितिको बैठकमा निर्वाचनको समीक्षा गर्ने र त्यसका लागि लिखित प्रतिवेदन पेश गर्न निर्देशन दिने निर्णय बैठकले गरेको छ । राष्ट्रियसभा निर्वाचनपछि मात्र आम निर्वाचनको समीक्षा हुने भएको छ ।बैठकमा बोल्ने नेताहरुले नेतृत्वको कमजोरीका कारण निर्वाचनमा पराजय भोग्नु परेको भन्दै कडा आलोचना गरेका थिए । 

सर्वोच्चको आदेश– सर्वोच्च अदालतले विपन्न परिवारका विद्यार्थीलाई निःशुल्क पठनपाठनको व्यवस्था मिलाउन सरकारलाई आदेश दिएको छ । संविधानले तोके अनुसार शुल्क तिर्न नसकेका कारण विद्यार्थीलाई शिक्षाको हकबाट बञ्चित नगराउन र विपन्नलाई निःशुल्क पठनपाठनको व्यवस्था मिलाउन सर्वोच्चले आदेश दिएको हो । 
गरिबीको रेखामुनी रहेका दलित, जनजाती, महिलालगायतका विद्यार्थीलाई सामुदायिक विद्यालयमा शुल्क नलिई पठनपाठन गराउन सर्वोच्चको आदेशमा भनिएको छ । 

नारायणगढ–मुग्लिन सडक– नारायणगढ–मुग्लिन सडकखण्डको काममा प्रगति हुन नसकेपछि माघ १३ गतेबाट दिउँसो सवारी रोकेर काम गरिने भएको छ । जिल्ला प्रशासन कार्यालय चितवनमा सरोकारवालाबीच भएको छलफलपछि रातको समयमाभन्दा दिउँसोको समयमा कामको प्रगति हुन सक्ने भन्दै यस्तो निर्णय गरिएको हो । बिहान १० देखि दिउँसो ४ बजेसम्म एक महिना सवारी रोकेर काम गरिने छ । 

‘राप्रपा प्रजातान्त्रिकको बैठक– राष्ट्रिय प्रजातन्त्र पार्टी प्रजातान्त्रिकले पार्टीका तर्फबाट सरकारमा सहभागी मन्त्रीहरुले सन्तोषजनक कार्यसम्पादन गरेको निष्कर्ष निकालेको छ । शुक्रबार बसेको सचिवालय र मन्त्रीहरुको संयुक्त बैठकले देशलाई अस्थिरताबाट समाधान दिन प्रतिनिधिसभा र प्रदेशसभा निर्वाचन सम्पन्न गर्ने प्रयोजनबाट गठित वर्तमान सरकारमा पार्टीले काम सफलतापूर्वक सम्पन्न गर्न महत्वपूर्ण भूमिका निर्वाह गरेको ठहर गरेको प्रवक्ता राजेन्द्र गुरुङले जानकारी दिए । 

विदेशका खबर– भारतको निर्वाचन आयोगले २० जना सांसदलाई अयोग्य भएको सिफारिस गरेपछि उनीहरूको सांसद पद खारेज हुने भएको छ । उनीहरु सवै जना भारतमा भ्रष्टाचार विरुद्ध अभियान सञ्चालन गरेको आम आदमी पार्टीका सांसद रहेको समाचार श्रोतले जनाएको छ । सन् २०१५ पछि पार्टी शक्तिमा आएपछि नियुक्त भएका उनीहरुलाई कारबाहीका लागि राष्ट्रपति समक्ष सिफारिस गरिएको छ ।
  

खेल खबर– नेपाली राष्ट्रिय क्रिकेट टिमका कप्तान पारस खड्का प्रथम मदन भण्डारी क्रिकेट सम्मानबाट सम्मानित भएका छन् । किर्तिपुरको टियु मैदानमा आयोजित प्रथम क्रिकेट महोत्सवमा राष्ट्रपति विद्यादेवी भण्डारीले उनलाई २५ हजार रुपैयाँ नगदसहित सम्मान गरेकी हुन् । नेपाली क्रिकेटमा योगदान गरेका विशेष व्यक्तिलाई दिइने यस सम्मानले वार्षिक निरन्तरता पाउने एकेडेमीका अध्यक्ष विनोद श्रेष्ठले जानकारी दिए ।