काठमाडौं, ६ माघ- धितोपत्र दलाल व्यवसायी प्रज्ञान सेक्यूरिटिज कारबाहीमा परेको छ । साधारणसभा अगाडि नै भाइबरमार्फत सेयर आह्वान गरेको भन्दै नेपाल धितोपत्र बोर्डले प्रज्ञान सेक्यूरिटिजलाई ७५ हजार रुपैयाँ जरिवाना तिराएको हो । प्रज्ञानका विराटनगर शाखा कार्यालय प्रमुखले २०७४ जेठ ४ गते हुने सिभिल बैंकको साधारण सभा अगाडि नै भाइवरमा गु्रप बनाएर बैंकको सेयर किन्न लगानीकर्ता उकास्ने आशयको जानकारी पठाएको थाहा पाए पछि बोर्डले छानबिन गरेको थियो । छानबिनमा प्रज्ञानका शाखा कार्यालय प्रमुखले सिभिलको सेयर किन्न आह्वान गरेको थाहा पाएपछि बोर्डले कारबाही गरेको हो । 

 प्रज्ञानले आफ्नो शाखा कार्यालयको काम कारवाहीलाई सूक्ष्मरुपमा अनुगमन नगरेको तथा व्यावसायिक आचरण कायम गराउन नसकेकाले   धितोपत्र सम्बन्धी ऐन, २०६३ अनुसार प्रज्ञान सेक्युरिटिजलाई ७५ हजार रुपैयाँ आर्थिक जरिवाना गरिएको धितोपत्र बोर्डले जनाएको छ ।  धितोपत्र सम्बन्धी ऐन, २०६३ को दफा ७६ बमोजिम धितोपत्र व्यवसाय सञ्चालन गर्ने संस्थाले आफ्नो व्यवसायलाई स्वस्थ र उच्चस्तरीय राख्ने, उचित सीप, होसियारी र मेहनतका साथ धितोपत्र व्यवसाय गर्ने, धितोपत्र बजारको उच्च मर्यादा कायम राख्ने, धितोपत्र व्यवसायसँग सम्बन्धित अभिलेखहरु राम्रोसँग राख्ने, धितोपत्र व्यवसाय सञ्चालन गर्ने सम्बन्धमा दक्ष जनशक्ति तयार गर्नका लागि कर्मचारीलाई आवश्यक तालिमको व्यवस्था गर्ने जस्ता कार्य गरी व्यावसायिक स्तर कायम गर्नुपर्ने व्यवस्था छ ।

धितोपत्र बोर्डले पछिल्लो समय बजार अनुगमन तथा सुपरीवेक्षण कार्यलाई सुदृढ गर्दै लगेको छ भने धितोपत्र सम्बन्धी ऐन बमोजिमको कारवाहीलाई पनि सशक्त बनाउँदै आएको छ ।