डिभिजन टू क्रिकेट : क्यानडालाई नजिते पनि अघि जान सक्छ त नेपाल ?

काठमाडौं, १ फागुन- आईसीसी विश्व क्रिकेट लिग 'डिभिजन टू'अन्तर्गत लिग चरणको आफ्नो अन्तिम खेल बाँकी रहँदा नेपाल ६ अंक जोड्दै अंकतालिकाको दोस्रो स्थानमा छ ।

पहिलो स्थानमा रहेको क्यानडाले पनि समान ६ अंक जोडेको छ । तर नेट रनरेट क्यानडाको निकै उच्च र नेपालको ऋणात्मक (माइनसमा) छ । यही ऋणात्मक रन रेटका कारण नेपाललाई शीर्ष २ मा पर्न आफ्नो अन्तिम खेल जित्नै पर्ने भएको छ ।

राउण्ड रोबिन लिगको अन्तिम खेलमा बुधबार नेपालले क्यानडाको सामना गर्दैछ । 'डिभिजन थ्री'बाट बढुवा भएको क्यानडा जारी प्रतियोगितामा निकै राम्रो लयमा छ ।

हेर्नुहोस् अंकतालिका :

नामिबिया र केन्याबाहेक सबै टोलीले १/१ खेल खेल्न बाँकी छ ।

नामिबिया र केन्याबीचको मंगलबारको खेलको नतिजा जे आए पनि त्यसले नेपालका लागि खासै फरक नपर्ने देखिएको छ । नामिबियाले जिते नेपाल तत्कालका लागि अंक तालिकाको तेस्रो स्थानमा झर्छ । तर आफ्नो अन्तिम खेल जित्दा पुन: दोस्रो स्थानमा उक्लिने छ । केन्याको सामान्य जित पनि नेपालका लागि फाइदाजनक हुने देखिँदैन । 

धेरै फाइदा नपुगे पनि नामिबियाकै हारमा नेपाल खुशी हुन भने सक्छ । नामिबिया नेपालसँगै शीर्ष २ को दौडमा कायम छ ।

एक मात्र विकल्प जित 

अन्तिम चरणमा बुधबार नेपाल र क्यानडा, युएई र नामिबिया तथा ओमान र केन्या आमने-सामने हुनेछन् ।

मंगलबारको खेलमा केन्यासँग हारेकै अवस्थामा पनि नामिबियासँग ४  अंक त हुन्छ नै । अन्तिम खेलमा युईएलाई जितेमा केन्या ६ अंक जोडेर हालको नेपाल भन्दा अघि जानेछ । अर्को तर्फ युएईले जितेमा पनि नेपालभन्दा अघि पुग्ने निश्चित प्राय: छ ।

माथि उल्लेखित खतराबाट बच्ने नेपालको एकमात्र विकल्प क्यानडाविरुद्ध जित नै हो । क्यानडालाई जितेमा अन्य कुनै पनि समीकरणले नेपाललाई शीर्ष २ मा पर्न छेक्ने छैन । नेपालले विश्वकप छनोटका लागि जिम्बावेको टिकट पक्का गर्नेछ ।

नगन्य २ समीकरण

क्यानडासँगको खेलमा जितविना अघि जान निकै गाह्रो छ । तर 'असम्भवप्राय:' मानिएका २ वटा समीकरण भने छन् ।

समीकरण १ : केन्यासँग नामिबियाको फराकिलो हार, नामिबियासँग युएईको झिनो हार

यस्तो अवस्थामा क्यानडासँग झिनो हारले नेपाल अघि जाने सम्भावना हुनसक्छ । तर, यसरी त्रिपक्षीय समीकरण मिल्नु असम्भवप्राय: छ ।

समीकरण २ : वर्षा वा अन्य कुनै कारणले खेल नै सम्भव नहुनु

वर्षा वा अन्य कुनै कारणले अन्तिम चरणको खेल नै सम्भव नभएर अंक बाँडिएको अवस्थामा पनि नेपाल अघि जानसक्छ ।

साथै केन्यासँग नामिबियाले हारेर नामिबिया र युएईको खेल मात्र रद्द भएमा पनि नेपाललाई फाइदा हुनेछ ।

फागुन १, २०७४ मा प्रकाशित

रामचन्द्र भण्डारी

पत्रकार भण्डारी राजनीति मामिलासँगै खेलकुदमा कलम चलाउँछन्।

लेखकबाट थप...

प्रतिक्रिया दिनुहोस