काठमाडौं, ७ फागुन — हाइटीमा यौन दुर्व्यवहार गरेको आरोप लागेकामध्ये तीन पुरुषले सन् २०११ मा भएको अनुसन्धानमा साक्षीहरूलाई भौतिक धम्की दिएको अक्सफ्यामले खुलासा गरेको छ ।

सार्वजनिक दबाबपछि अन्तर्राष्ट्रिय परोपकारी संस्था अक्सफ्यामले आफ्ना केही कर्मचारीको कथित दुर्व्यवहारका सम्बन्धमा आन्तरिक प्रतिवेदन सार्वजनिक गरेको छ ।   

सन् २०११ को प्रतिवेदनमा अक्सफ्यामले बदमासी गर्ने कर्मचारीहरूले अन्य परोपकारी संस्थामा काम गर्नबाट रोक्नका लागि थप काम गर्नुपर्ने बताएको थियो । 

तर यो चेतावनी हुँदाहुँदै पनि दुर्व्यवहारमा संलग्न भनिएका भनेका व्यक्ति अन्य परोपकारी संस्थामा जागिर खान पुगेका छन् ।   

अक्सफ्यामसँग लगभग १० हजार कर्मचारी छन् र तिनीहरू ९० देशमा काम गर्छन् । संस्थाले प्रतिवेदनको सम्पादित संस्करण सार्वजनिक गरेको छ । आफूले लिएका निर्णयका सम्बन्धमा सम्भव भएसम्म पारदर्शी हुने इच्छा आफूले राखेको संस्था बताउँछ । 

उक्त ११ पृष्ठको कागजातमा उल्लेखित मानिसहरूको नाम कालो मसीले पोतेर ढाकिएको छ । साक्षीहरूलाई धम्क्याउने आरोप लागेका तीन व्यक्तिको नाम पनि ढाकिएको छ । 

अक्सफ्यामले असम्पादित मूल प्रतिवेदन हाइटी सरकारलाई प्रस्तुत गर्दै गल्तीका लागि माफी माग्ने भएको छ । 

हाइटीमा अक्सफ्यामका कर्मचारीहरूले यौनकर्मीको सेवा लिएको आरोपमा अनुसन्धान गर्नका लागि उक्त संस्थामाथि अन्तर्राष्ट्रिय दबाब परेको छ ।

बीबीसीबाट