काठमाडौं, ८ फागुन — भारतको बैंकिङ क्षेत्रको सबभन्दा ठूलो घोटालामा आरोपित हीरा व्यापारी नीरव मोदीले पञ्जाब नेसनल बैंक (पीएनबी) को व्यवस्थापनलाई पत्र लेखेका छन् । 

पत्रमा नीरवले भने, ‘यो घटनालाई उजागर गरेर पीएनबीले रिकभरीको सबै बाटो बन्द गरिदिएको छ । बैंकले हतार गर्दा मेरो ब्रान्ड र व्यापार चौपट भएको छ । अब म पैसा फिर्ता दिन्नँ ।' 

नीरवले दाबी गरेअनुसार, उनले जति रकम तिर्नुपर्ने भनिएको छ खासमा त्यति होइन । पाँच हजार करोड भारुभन्दा कम रकम हो भन्छन् नीरव । 

त्यसका साथै उनले आफ्ना खाताहरूमा भएको रकमबाट २२ सय कर्मचारीलाई तलब दिनका लागि अनुमति पनि मागेका छन् । 

उता सीबीआईले सोमवार राति पीएनबीका थप तीन व्यवस्थापकलाई पक्राउ गरेको छ । कुल ११, ३५६ करोड भारुको घोटालामा नीरव र उनका नातेदार तथा गीताञ्जली जेम्सका मालिक मेहुल चौकसी पनि आरोपित हुन् । 

यिनीहरूमाथि पीएनबीका अधिकारीहरूसँग मिलेर कीर्ते लेटर अफ अन्डरटेकिङ्समार्फत विदेशी खाताहरूमा हजारौं करोड रुपैयाँ ट्रान्स्फर गरेको आरोप छ । 

एजेन्सी