काठमाडौं, २२ फागुन- निजी क्षेत्रको पहिलो मोवाइल सेवा प्रदायक एनसेलको ग्राहक संख्या गत एक वर्षको अवधिमा १०.१९ प्रतिशतले बढेको छ । यससँगै एनसेलको ग्राहक संख्या १ करोड ६४ लाख पुगेको कम्पनीको प्रमुख लगानीकर्ता आजियाटाले जनाएको छ । आजियाटाले २०१७ को चौथो त्रैमासिकको रिपोर्ट सार्वजनिक गर्दै जनवरी देखि डिसेम्बर सम्मको अवधिमा एनसेलको १५ लाख १६ हजार नयाँ ग्राहक थपिएको बताएको छ । उसका अनुसार एनसेलमा ग्राहक संख्याको राम्रो वृद्घि भएको छ जसको सहयोगले अपेक्षित अन्तर्राष्ट्रिय लामो दुरीको कल सेवाबाट भएको आय गिरावटमा राहत दिएको छ ।

अन्तर्राष्ट्रिय लामो दुरीको कलबाट हुने एनसेलको आम्दानी १९.६ प्रतिशतले घटेको आजियाटाले बताएको छ । पछिल्लो समयमा विदेशबाट नेपाल फोन गर्न र नेपालबाट विदेशमा फोन गर्नका लागि इन्टरनेट सेवाका माध्यामबाट विभिन्न एपहरु जस्तै ह्वाट्सएप, भाइबर, इमो, स्काइप आदीको प्रयोग बढेको लगायतका कारणले गर्दा टेलिकम कम्पनीहरुको अन्तर्राष्ट्रिय लामो दुरीको कलबाट हुने आयमा गिरावट आईरहेको छ ।  एनसेलको २०१७ को कुल आम्दानी रु ५८ अर्ब ५४ लाख रहेको छ । जसमा इन्टरनेट सेवाको आय पनि बढेको देखिन्छ । रिपोर्टका अनुसार कुल आम्दानीमा डाटाको योगदान १९ प्रतिशत छ र कुल ग्राहक संख्यामा झण्डै ४४ प्रतिशतले डाटा सेवा लिएका छन् । एनसेल कम्पनी आफैले पनि जुन २०१७ मा फोरजी सेवाको शुरुवात पश्चात डाटा सेवाको प्रयोगमा वृद्घि भएको जनाउदै आएको छ ।

एनसेलले हाल सम्ममा देशका विभिन्न २१ शहरहरुमा फोरजी सेवा पुर्याईसकेको छ जुन अहिले देशकै बृहद फोरजी नेटवर्कको रुपमा पनि चिनीएको छ । आजियाटा रिपोर्टका अनुसार २०१६ को तुलनामा २०१७ मा एनसेलको डाटा सेवाको आए १७.९ प्रतिशतले बढेको छ । कम्पनीका ग्राहकले गर्ने डाटाको खपत पनि २०१७ मा बढेर २ करोड ७७ लाख जिबी पुगेको छ । सन् २०१६ मा कम्पनीको कुल डाटा खपत अथवा ट्राफिक १ करोड २० लाख जिबी थियो ।