रूकुम पश्चिम, ६ वैशाख– नेकपा माअाेवादीका नेता तथा पूर्व गृहमन्त्री जनार्दन शर्माले रुकुम पश्चिमका १५ टुहुरा बालबालिकाको अभिभावकत्व ग्रहण गर्दै विद्यालय भर्ना गराएका छन्।  नेता शर्माले विद्यालय भर्ना गराएका १५ वटै बालबालिका आठबीसकोट नगरपालिकाका हुन् । 

शर्माले आठविसकोट नगरपालिका वडा नं ९ मा रहेको सिस्ने हिमाल बालगृह र दीपज्योति आधारभूत विद्यालयमा १५ जना बालबालिकालाई भर्ना गराएका हुन् । बालबालिकालाई विद्यालय भर्ना गर्नाका साथै शर्माले निःशुल्क विद्यालय पोशाकसमेत प्रदान गरेका थिए ।

१५ बालबालिकाकाे अभिभावकीय जिम्मेवारी लिँदै उनले गुणस्तरीय शिक्षा नहुँदा बेरोजगारीको संख्या बढ्दै गएको बताए । राज्यले प्रदान गर्ने सेवा सुविधा सबै नागरिकले समान तरिकाले पाउनुपर्ने मान्यता स्थापित गर्न आफूले टुहुरा बालबालिकाको जिम्मा लिएको पनि उनले बताए। 

विद्यालयको पहुँचमा पुग्न नसकेका बालबालिकाको अभिभावकत्व ग्रहण गर्न पूर्वमन्त्री शर्माले स्थानीय तहहरुसँग आग्रह गरे । 

शर्माले नवराज बुढा, डिल्ली बुढामगर, किरण पुनमगर, खिमा ओली, सुशीला चनारा, पूर्णिमा शाही, रीता सार्की, रोशनी विक, देविका विक, जितबहादुर घर्ति, रुपा विक, विनीता सार्की, जीवन बटाला र तिलक बटालाको अभिभावकत्व लिएका हुन् । ती बालबालिकाहरू आमाबुबा नभएर संरक्षकविहीन थिए ।