धनगढी, ७ बैशाख– नेपाल पत्रकार महासंघ प्रदेश ७ मा हुने निर्वाचनको लागि पत्रकारका दलीय संगठनहरुलाई उम्मेदवार छान्न हम्मेहम्मे भएको छ ।

निर्वाचनको पूर्व घोषित कार्यक्रम अनुसार आज (शुक्रबार) दिउँसो ३ बजेसम्म समय सीमा तोकिएको थियो । पछि एक घण्टा थप गरी ४ बजेसम्म पुर्याइएको थियो । तर संगठनहरुले उम्मेदवार छान्न नसक्दा सो अवधीभित्र ८ जनाको मात्रै उम्मेदवारी परेको निर्वाचन समिति संयोजक करुणाकर पाण्डेले जनाए ।

सो अवधीमा नेकपा (माओवादी केन्द्र) निकट प्रेस सेन्टरबाट पाँच र काँग्रेस निकट प्रेस युनियनको तर्फबाट तीन जनाको उम्मेदवारी परेको संयोजक पाण्डेले बताए । उनको अनुसार प्रेस युनियनको तर्फबाट महासचिवमा योगेश रावलसहित एक जना सचिव र एक सदस्यको उम्मेदवारी परेको हो ।

त्यस्तै, प्रेस सेन्टरबाट उपाध्यक्षमा दुर्गा भण्डारी, सचिवमा करन तम्राकारसहित पाँच जनाको उम्मेदवारी परेको छ ।

आज उम्मेदवारी दर्ता गर्न नसकेपनि प्रेस युनियन र प्रेस सेन्टर उम्मेदवार टुंग्याएका छन् । कैलाली जिल्ला अध्यक्ष जगत साउँदका अनुसार प्रेस सेन्टर, प्रेस युनियन र प्रेस चौतारीबीच भएको सहमति अनुसार युनियनले महासचिवमा योगेश रावल, सचिव प्रेम चुनारा (समावेशी), सदस्यमा बरुण पनेरु, शिवराज खत्री, भीम चौधरी (जनजाति), गम्भिर उराव (मधेसी) लाई छनौट गरेको छ ।

त्यस्तै प्रेस सेन्टरले उपाध्यक्षमा दुर्गा भण्डारी, सचिवमा करण तम्राकार, सदस्यमा नरेन्द्र रावल, अरुण भट्ट, मुकेश टेर्रा (जनजाति), खडक ओली, राधिका सापकोटा, विराज रोश्यारालाई छनौट गरेको प्रेस सेन्टर प्रदेश अध्यक्ष रामसिंह ठगुन्नाले बताए ।

तर नेकपा एमाले निकट प्रेस चौतारीले अझै उम्मेदवार टुंग्याउन सकेको छैन । चौतारीका कैलाली जिल्ला अध्यक्ष मीन ठकुरीका अनुसार अध्यक्षमा धेरै आकंक्षी देखिएपछि उम्मेदवार टुंग्याउन अझै नसकेको बताए । उनको अनुसार अध्यक्षमा हरि जोशी, अर्जुन शाह आकंक्षी देखिएका छन् ।

निर्वाचन कार्यालयमा तालाबन्दी

यहि बैशाख २० गते हुने महासंघको आसन्न निर्वाचनमा तीन ठूला पत्रकार संगठनले साना संगठनलाई वेवास्ता गरी भागवण्डा गरेको भन्दै निर्वाचन कार्यालयमा आज तालाबन्दी गरेका थिए । क्रान्तिकारी पत्रकार संगठन, प्रगतिशिल पत्रकार संघ र संघीय प्रेस फोरमले तालाबन्दी गरेका हुन् ।

आफुहरुलाई समावेश नगरिए थप संघर्षको कार्यक्रम गरिने प्रगतिशिलका प्रदेश संयोजक सुशिल ढुंगानाले चेतावनी दिए ।

गरिएको तालाबन्दी र ठूला संगठनहरुले उम्मेदवार छान्न नसक्दा उम्मेदवारीको समय थप लम्ब्याइएको बुझिएको छ । बैशाख ९ गते साँझ ४ बजेम्मको लागि समय लम्ब्याइएको निर्वाचन समिति संयोजक पाण्डेले जनाए । 

स्रोतका अनुसार साना संगठनहरुको असन्तुष्टिलाई सम्बोधन गर्न अध्यक्ष पद पाएको संगठनले अन्य पदमा ती असन्तुष्टहरुलाई समावेश गरी समस्या समाधानको विकल्प खोजिन थालेको छ ।

महासंघको विधान अनुसार प्रदेश समितिको अध्यक्ष १, उपाध्यक्ष खुल्ला १, महिला १, महासचिव १, सचिव खुल्ला १, समावेशी १, कोषाध्यक्ष १, खुल्ला सदस्य ५, महिला सदस्य ३, दलित १, आदिवासी जनजाति १, मधेशी २ र अल्पसंख्यक १ गरी २१ सदस्यीय समिति निर्माण गरिने भएको छ ।