काठमाडौं, ९ वैशाख- प्रधानमन्त्री एवम् नेकपा एमालेका अध्यक्ष केपी शर्मा ओलीले आफूहरूसामु पार्टी एकतालाई सफल पार्नेबाहेक अर्को बाटो नभएको बताएका छन् ।

लेनिन जयन्ति तथा नेपाल कम्युनिष्ट पार्टीको एकता दिवसका अवसरमा राष्ट्रिय सभागृहमा एमाले र माओवादी केन्द्रले आइतबार संयुक्तरूपमा आयोजना गरेको कार्यक्रममा ओलीले सो कुरा बताएका हुन् ।

'एकतालाई सफल पार्नेबाहेक अर्को बाटो छैन हामीसामु छैन,' ओलीले भने, 'अब मेरो जुत्ता मिलेन, हुन्न भन्ने हुँदैन, बरु खुट्टा ताछतुछ पारेर पनि मिलाउनुपर्छ ।'

पार्टी एकताका लागि देशवासीसामु प्रतिबद्धता जनाइसकेको भन्दै उनले अब यो भएन, त्यो भएन भन्ने बेला नरहेको बताए ।

कसैको टाउकोमा दोष थुपारेर उम्किने अवस्था नरहेको भन्दै उनले पार्टी एकता भएरै छाड्ने जिकिर गरे ।