आगामी वर्ष ७ लाख लेन्स उत्पादन गर्ने तिलगंगा आँखा प्रतिष्ठानको घोषणा

तस्वीर : सीमा तामाङको ब्लगबाट
बैशाख २५, २०७५

काठमाडौं, २५ वैशाख–तिलगंगा आँखा प्रतिष्ठानले आगामी वर्ष आँखाको लेन्स उत्पादन दोब्बर बनाउने भएको छ ।

वार्षिक साढे तीन लाख अँखाको लेन्स उत्पादन गर्दै आएको प्रतिष्ठानले आगामी वर्ष दोब्बर लेन्स उत्पादन गर्ने प्रतिष्ठानका कार्यकारी निर्देशक डाक्टर सन्दुक रुइतले लोकान्तरलाई बताए । प्रतिष्ठानले सरकारको सहयोग पाएपछि आगामी वर्ष उत्पादन दोब्बर बनाउने भएको हो ।


ADVERTISEMENT

‘नेपालमा उत्पादित लेन्स विश्व बजारमा मोडलको रूपमा विकास भइरहेको छ । अहिले हामीले वार्षिक साढे तीन लाख लेन्स उत्पादन गर्दै आएका छौं,’ डा. रुइतले भने, ‘विश्व बजारको माग हेर्ने हो भने त हामीले वार्षिक १० लाख उत्पादन गर्न सके पनि सबै खपत हुने अवस्था छ । सरकारले हामीलाई प्रोत्साहन गरेको छ, हामी आगामी वर्ष हाम्रो उत्पादनलाई दोब्बर बनाउँछौं ।’

निजी लगानीमै आँखाको लेन्स उत्पादन गर्दै आएको तिलगंगा आँखा प्रतिष्ठानलाई सरकारले पहिलोपटक अनुदान  सहयोग गरेको छ । उद्योग, वाणिज्य तथा अपूर्ति मन्त्री मातृकाप्रसाद यादवले १० करोडको चेक प्रदान गरेका थिए ।

प्रतिष्ठानलाई अनुदान रकमको चेक प्रदान गर्दै मन्त्री यादवले सरकारको सहयोगले प्रतिष्ठानलाई मोतियाबिन्दुको शल्यक्रियापछि राखिने लेन्स उत्पादन गरी विश्वका विभिन्न मुलुकमा निर्यात गर्दै व्यापार घाटा कम गर्न महत्त्वपूर्ण सहयोग पुग्ने विश्वास व्यक्त गरेका छन् ।

‘नेपाल आँखा कार्यक्रम’ले मोतियाबिन्दुको शल्यक्रियापछि राखिने लेन्स उत्पादन गर्दै आएको छ । डा. रुइतले सरकारले पहिलोपटक लेन्स उत्पादनको लागि सहयोग गरेकोमा खुसी व्यक्ति गरे ।

‘ढिलै भए पनि सरकारले हामीलाई हेर्‍यो, सरकारको दृष्टिकोण सकारात्मक छ भन्ने आशा पलाएको छ,’ डा. रुइतले लोकान्तरसँग भने, ‘सरकारको यो सहयोगले लेन्स उत्पादन बढाउन सघाउ पुर्‍याएको छ । हामीले विदेशी मुलुकमा लेन्स विक्री गर्दै आएको हुँदा हाम्रो  देशको आर्थिक वृद्धिदरमा सहयोग पुर्‍याउन पनि मद्दत गर्ने छ ।’

सरकारको सहयोगले नेपालमा रहेका गरीब जनतालाई सुलभ मूल्यमा लेन्स दिन सहयोग पुग्ने उनको भनाइ छ ।

प्रतिष्ठानले उत्पादन गरेको लेन्स मोदियाबिन्दु भएका नेपाली बिरामीले न्यूनतम २ सय रुपैयाँमा पाउने गरेका छन् । सरकारको सहयोगले नेपालमा रहेका गरीब जनतालाई सुलभ मूल्यमा लेन्स उपलब्ध गराउन सहयोग पुग्ने उनको भनाइ छ ।

‘हामीले मोलियाबिन्दुको उपचारपछि प्रयोग हुने दुई प्रकारको लेन्स उत्पादन गछौँ, पोलडेबल र नन पोलडेबल, पोलडेबलको मुल्य १२ सय र नन पोलडेबलको मूल्य दुई सयमा नेपालीले पाउँछन्,’ डा. रुइतले भने, ‘सरकारको यो सहयोगले नेपालीलाई सस्तोमा लेन्स दिन सक्छौं ।’

बैशाख २५, २०७५ मा प्रकाशित

रिता लम्साल

रिता लम्साल लोकान्तरका लागि स्वास्थ्य र सामाजिक मामिलामा कलम चलाउँछिन् । 

लेखकबाट थप...

प्रतिक्रिया दिनुहोस

ताजा समाचार