वाराणसी, १ जेठ– भारतीय राज्य उत्तर प्रदेशको बनारस (वाराणसी)मा एक निर्माणाधिन पुल (फ्लाइओभर)को एक हिस्सा सडकमा खस्दा १२ जनाको मृत्यु भएको छ । घटनामा ५० जनाभन्दा बढी घाइते भएका छन् । 

फ्लाइओभरको निर्माण क्यान्ट रेलवे स्टेशनको अगाडि गरिँदै थियो । दुर्घटना भएको क्षेत्र भारतीय प्रधानमन्त्री नरेन्द्र मोदीको संसदीय क्षेत्र हो । 

निर्माणाधिन पुलका हिस्सा भाँचिएर सडकमा गुडिरहेका गाडीमाथि खसेको थियो । पुलको हिस्सा खस्दा सडकमा रहेका गाडी तथा मानिसहरु थिचिएका थिए । 

उत्तर प्रदेशका मुख्यमन्त्री योगी आदित्यनाथले उद्दार कार्यका लागि पहल थालिएको बताएका छन् । मुख्यमन्त्री आदित्यनाथले घटनाप्रति दुःख जनाउँदै तत्काल राहत र उद्दारको कार्यमा जुट्न मातहतका निकायलाई निर्देशन पनि दिएका छन् ।