मदन भण्डारी स्मृति दिवसमा एमाले माओवादीबीच पार्टी एकता

जेठ २, २०७५

काठमाडौं २ जेठ– कयौ आशंका र अड्कलबाजीका बीच देशका प्रमुख दुई ठूला कम्युनिष्ट पार्टी एकताका लागि तयार भएका छन् । मदन भण्डारीको स्मृति दिवसको अवसर पारेर दुई दलबीच एकता हुन लागेको हो । 

यसअघि लेनिन जयन्तीको अवसर पारेर दुई पार्टीबीच एकता गर्ने तयारी गरिएको भएपनि केही विषयमा सहमति जुट्न नसकेपछि एकता प्रकृया पर सरेको थियो । 

जनताको बहुदलीय जनवादको शुत्राधार र एमालेका आदर्श ने मदन भण्डारीको स्मृति दिवसको अवसर पारेर माओवादीसँग एकता गर्न लागेको छ । 

एमालेका तत्कालिन महासचिव मदन भण्डारीको २०५० साल जेठ ३ गते चितवनको दासढुंगामा सवारी दुर्घटनामा परि मृत्यु भएको थियो । 

मार्गदर्शक सिद्धान्त जनताको बहुदलीय जनवाद की माओवादीले अंगीकार गर्दै आएको एक्काइसौं शताव्दीको जनवादका विषयमा माओवादी र एमालेबीच कुरा मिलिसकेको छैन । ती विषयहरुमा विधिसम्मत छलफल गरी आवश्यक परिमार्जन र विकास गर्न सकिने एमाले र माओवादीबीचको पार्टी एकता सम्बन्धि सात बुँदे सहमतिमा उल्लेख छ ।

सहमतिमा जनताको बहुदलीय जनवाद अन्तर्गत अवलम्बन गरेको शान्तिपूर्ण बहुदलीय प्रतिस्पपर्धा मार्फत आफ्नो श्रेष्ठता स्थापित गर्ने लगायतका मान्यमा समान धारण रहेको उल्लेख गरेका छन् । 

भोलि एकिकृत दल दर्ता गर्ने तयारी

दुबै पार्टीको केन्द्रीय समितिबाट औपचारिक निर्णय गराएर बिहीवार नै निर्वाचन आयोगमा एकीकृत कम्युनिष्ट पार्टीको दर्ता गर्न लागिएको हो । बिहीवार नै पत्रकार सम्मेलन मार्फत एकताको घोषणा गर्ने दुई दलको तयारी छ । 

पार्टी एकताको घोषणा भने केही दिनपछि काठमाडौंमा सभा आयोजना गरेर गर्ने दुई दलको तयारी छ । प्रधानमन्त्री एवं नेकपा एमालेका अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डबीच बुधवार बिहान भएको छलफलमा पार्टी एकताको सहमति भएको हो । 

पार्टी एकीकरणमा सहभागी केही नेताहरुसहित प्रधानमन्त्री निवास बालुवाटारमा बसेको दुई दलका शीर्ष नेताको बैठकले पार्टी एकता गर्ने निर्णय गरेको थियो । 

‘सकेसम्म भोलि (बिहीवार) नै नभए सरकारका नीति तथा कार्यक्रम आउनु अगावै जेठ ६ गतेभित्र पार्टी एकता गर्ने सहमति भएको छ’ एमाले स्रोतले भन्यो । 

माओवादी केन्द्रका अध्यक्ष प्रचण्डलाई यही संसदको पछिल्लो दुई बर्ष प्रधामनन्त्री बनाउने सुनिश्चिततासहित पार्टी एकतामा ‘ब्र्रेक थु्र’ भएको स्रोतको भनाइ छ । केन्द्रीय समितिमा एमालेको ५६ प्रतिशत र माओवादी केन्द्रको ४४ प्रतिशत रेसियोमा एकता गर्ने सहमति भएको स्रोतको भनाइ छ । यसअघि माओवादीले बराबरी हैसियत र एमालेले ६०/४० को रेसियोमा एकता गर्न प्रस्ताव गरेपछि सहमति जुटन सकेको थिएन । 

पार्टी एकता गर्ने भन्दै गत बर्षको असोज १७ गते एमाले र माओवादीले वामपन्थी गठबन्धनको घोषणा गरेका थिए । दुई दलले विबादित बिषयलाई महाधिवेशनमा लगेर टुंगाउने गरी फागुन ७ गते पार्टी एकताको सैद्धान्तिक सहमति भएको थियो । 

तर सरकार सन्चालनमा प्रधानमन्त्री ओलीको एकलौटी बढेको भन्दै माओवादी झस्किएको थियो । वैशाख ९ मै पार्टी एकता गर्ने भनिएपनि तयारी अभाव जनाउँदै पार्टी एकता भएको थिएन । प्रचण्डले संसदको यही कार्यकालमा प्रधानमन्त्री र महाधिवेशनपछि अध्यक्ष सुनिश्चितताको माग राखेपछि सहमति जुटन सकेको थिएन ।

ओलीपछिको प्रधानमन्त्री प्रचण्ड

संसदको ५ वर्षे कार्यकालको पछिल्लो दुई वर्ष प्रचण्डलाई प्रधानमन्त्री बनाउन राजी भएपछि माओवादी पार्टी एकताका लागि तयार भएको हो । ओली प्रधानमन्त्री रहेको समयमा पार्टीमा कार्यकारी भूमिका पाउनु पर्ने प्रचण्डको माग छ ।

तत्कालका लागि एकतापछि बन्ने दुई जना अध्यक्ष रहने यसअघि नै सहमति भइसकेको छ । एकताको औपचारिक निर्णय गर्न दुबै पार्टीको स्थायी समितिको बैठक बसिरहेका छन् । एमाले स्थायी समिति बैठक बालुवाटार र माओवादी सचिवालय बैठक खुमलटारमा बसिरहेको छ । दुबै दलले बिहीवार केन्द्रीय समितिको बैठक बोलाएका छन् । 

पार्टी एकताको निर्णय केन्द्रीय समितिबाट गर्नुपर्ने भएकोले बैठक बोलाइएको एमाले प्रचार विभागका सचिव विष्णु रिजालले जानकारी दिए । बिहीवार अपरान्ह राष्ट्रिय सभा गृहमा पत्रकार सम्मेलनको आयोजना गरी पार्टी एकता घोषणाको तयारी छ । 

पार्टीको नाम नेपाल कम्युनिष्ट पार्टी राख्ने सहमति भएपनि निर्वाचन आयोगमा सो दल दर्ता छ । नेत्र विक्रम चन्द विप्लवको पार्टीको नाम पनि नेपाल कम्युनिष्ट पार्टी राखिएको छ । 
 

जेठ २, २०७५ मा प्रकाशित

प्रतिक्रिया दिनुहोस