नेकपा इतिहासकै ठूलो दल बन्दै : एकता घोषणा अघि के-के हुँदैछ ?

काठमाडौं, ३ जेठ– दुई ठूला वाम दल नेकपा एमाले र नेकपा माओवादी केन्द्र बिहीबार एकीकरण हुँदै छन् । मदन–आश्रित स्मृति दिवसको अवसर पारेर दुवै पार्टीले आ–आफ्ना पुराना संरचना विघटन गरी नेपाल कम्युनिस्ट पार्टी गठन गर्न लागेका हुन् । 

पार्टी एकिकरण अगाडी दुवै दलको संयुक्त र छुट्टाछुट्टै बैठक बस्दै छन् भने एकता संयोजन समितिको बैठक पनि बस्न लागेको छ । यसैगरी दुवै पार्टीका अध्यक्ष एकै कार्यक्रममा सहभागी पनि हुने छन् ।

जननेता मदन भण्डारी र जीवराज आश्रितको स्मृति दिवसको अवसरमा एमालेले बिहान ७ः३० बजे पुरानो पार्टी कार्यालय बल्खुमा आयोजना गरेको कार्यक्रममा प्रधानमन्त्री एवम् एमाले अध्यक्ष केपी ओली र माओवादी अध्यक्ष प्रचण्ड सहभागी हुने छन् । 

मदन भण्डारीको सालिकमा ओली–प्रचण्डद्वारा माल्यार्पण गर्ने कार्यक्रम छ ।  कार्यक्रममा प्रमुख वक्ता प्रधानमन्त्री ओली र माओवादी अध्यक्ष प्रचण्डले पार्टी एकताका विषयमा महत्वपूर्ण घोषणा गर्ने बताइएको छ । 

यस्तै बिहान १०ः०० बजे पार्टी एकता संयोजन समितिको बैठक बस्दै छ । बैठकबाट एकताको निर्णय हुने छ । प्रधानमन्त्रीनिवास बालुवाटारमा संयोजन समितिको बैठक बोलाइएको हो ।

बिहान ११ः०० बजे एमाले केन्द्रीय कमिटी बैठक बस्दै छ भने १ः०० बजे माओवादी सचिवालयको बैठक बसने छ  । दुवै पार्टीका बैठकले पार्टी विघटन गरी एकीकरणको निर्णय गर्नेछन् ।

त्यसपछि दिउँसो ३ः०० बजे दुवै पार्टीको संयुक्त बैठक बस्ने छ । दुवै पार्टीले एकता अनुमोदन गरेलगत्तै संयुक्त बैठक बस्ने तयारी भएको हो । बैठकमा दुवै पार्टीका नेताहरू सहभागी हुनेछन् ।

यसैगरी दिउँसो ४ः०० बजे निर्वाचन आयोगमा नयाँ पार्टी दर्ता गर्ने तयारी छ ।  एकता संयोजन समिति र दुवै पार्टीको केन्द्रीय कमिटी बैठकको निर्णयपछि एकीकरणको निर्णयसहित नेपाल कम्युनिस्ट पार्टी दर्ताका लागि निर्वाचन आयोगलाई पत्राचार गर्ने तयारी छ । 

निर्वाचन आयोगमा नयाँ पार्टी दर्ता भएपछि नेपाल कम्युनिस्ट पार्टीका तर्फबाट साँझ ५ः०० बजे पत्रकार सम्मेलन गरेर एकताको औपचारीक घोषणा हुने छ । राष्ट्रिय सभा गृहमा पत्रकार सम्मेलन गरी औपचारिक घोषणा गर्न लागिएको हो ।

एमाले र माओवादीको एकीकरणबाट बन्ने नयाँ पार्टी जनमतका आधारमा इतिहासकै ठूलो पार्टी बन्नेछ । ५२.३७५ जनमतको प्रतिनिधित्व गर्नेछ ।

जेठ ३, २०७५ मा प्रकाशित

प्रतिक्रिया दिनुहोस