काठमाडौं, ३ जेठ– बिहिबार एमाले र माओवादी केन्द्रबीच पार्टी एकता भएर नेपाल कम्युनिष्ट पार्टी (नेकपा) गठन हुनुलाई कांग्रेसले सकारात्मक रुपमा लिएको जनाएको छ । 

दलहरुबीचको एकताले लोकतन्त्रलाई बलियो बनाउने भन्दै यसलाई पार्टीले सकारात्मक रुपमा लिएको कांग्रेसको भनाई छ । 

कांग्रेस प्रवक्ता विश्वप्रकाश शर्माले प्रमुख दल एमाले र माओवादी केन्द्रबीचको एकतालाई पार्टीले स्वागत गर्ने बताए । 

‘दलहरुको विभाजनले लोकतन्त्रलाई क्षति गर्छ ।  दलहरुबीच एकता भयो भने त्यसले स्वाभाविक रुपमा लोकतन्त्रलाई बलियो बनाउँछ’, शर्माले भने, ‘त्यस हिसावले नेपाली कांग्रेस पार्टीले कुनै पनि दलको एकतालाई स्वागत गर्छ भने आफ्नो प्रतिस्पर्धी मुख्य दलहरुबीचको एकतालाई पार्टीले स्वागत नै  गरेका छौं । यसमा हामीले शुभकामना पनि दिएका छौं ।’

यद्यपी केहि विषयमा चाहिँ प्रतिपक्षीको रुपमा पनि र एउटा पाको राजनीतिक दलको रुपमा पनि पार्टीले नेकपालाई सजग गराउने कर्तब्य भएको बताएका छन् । 

सत्ता बन्दा भन्दा बढी खतरा सत्ताको दम्भमा हुने भन्दै शर्माले त्यसप्रति पार्टी सधैं चनाखो भइराख्ने बताए ।  ‘एमाले र माओवादी विपरित ध्रुवको कम्युनिष्ट आन्दोलनको धारका हुन्’, उनले भने, ‘एकता भएपनि पछि केन्द्रीय सत्तामा को हाबी हुने भन्ने हुन सक्छ ।’

यदी यस्तो अवस्था आइलागे  नयाँ ढंगको दम्भ सिर्जना हुन सक्ने खतरा औंल्याउँदै शर्माले त्यो लोकतन्त्रका लागि खतरनाक हुन सक्ने बताए । 

महाभारतको लामो ब्याख्याको एक लाइन निश्कर्ष ‘अहंकारको बृक्षमा विनाशको फल लाग्छ’ भन्ने हुने भन्दै उनले त्यसप्रति बेलैमा सचेत हुनुपर्नेमा जोड दिए । उनले अगाडि भने, ‘उहाँहरुमा दम्भ रह्यो भने उहाँहरु र लोकतन्त्रलाई क्षति गर्छ । नेपालको अग्रगामीलाई क्षति गर्छ ।’

राजनीतिको सुरुवाती दिनमा प्रचण्ड र केपी ओलीले संसदीय व्यवस्थाको प्रधानमन्त्री हुन्छु भन्ने कल्पना समेत नगरेको उनले बताए । उनले भने, ‘बरु संसदीय व्यवस्थाको पार्थिक शरीरमाथि सर्वहाराको अधिनायकवाद स्थापना गर्ने भन्ने सपना र सपथ लिनिु भएको थियो । परिस्थितिले उहाँहरुले यो ठाउँमा ल्याइदिएको छ ।’ 

बाध्यताको बाटो भन्दा पनि अब ओली र प्रचण्डले मनस्थितिगत निष्ठाको बाटो बनाए एकता र लोकतन्त्रको भविष्य उज्ज्वल हुने उनको भनाई छ।

नेकपाले नेपाली जनतालाई धेरै सपना बाँडेको भन्दै त्यो सपना पूरा गर्न नसके स्वाभाविक रुपमा जनताबाट तिरस्कृत हुने पनि उनको बुझाई छ । अहिले दुई पार्टीबीच एकता भएपनि कांगे्रसलाई फाइदै पुगेको पनि उनको दाबी थियो ।