काठमाडौं, १५ जेठ – आगामी आर्थिक वर्षको बजेटका सम्बन्धमा अर्थविश्लेषकहरूको मिश्रित प्रतिक्रिया आएको छ ।

विश्लेषक हरि रोकाले बजेटमा खासै नयाँ केही नभएको टिप्पणी गरे । ‘बजेटमा खासै नयाँ केही छैन । पहिला जसरी आउँथ्यो त्यसी नै आयो । संरचनागत परिवर्तन गर्ने गरी आउने अपेक्षा थियो, त्यो केही भएन,’ रोकाले लोकान्तरसँग भने ।

बजेटमा स्पष्टता नभएको रोका बताउँछन् । थप ५ युवालाई रोजगारी उपलब्ध गराउने कुरा समेटिएको प्रति व्यंग्य गर्दै रोकाले भने, ‘कसरी रोजगारी दिने ? कहाँ दिने भन्ने कुरा स्पष्ट नै भएन । कि युवराजजी आफैँले दिने पो हो कि !’

विकास खर्च कसरी हुने भन्ने कुरा पनि स्पष्ट हुन नसकेको उनको भनाइ छ ।

बजेट कार्यान्वयनका सन्दर्भमा कुनै कुरा स्पष्ट नहुनु बेठिक भएको उनको टिप्पणी छ । रोकाले भने, ‘स्थानीय तहमा थिंकट्यांकबाहेक कुनै पनि संस्थाको परिकल्पना गरेको देखिएन । स्थानीय तहमा पूर्वाधार निर्माणकै समस्या छ । कति खर्च लाग्छ, कसरी बनाउँछ, यसलाई सरकारले कसरी व्यवस्थापन गर्ने हो । यो कुरा स्पष्ट छैन । युवराजजीले नै बनाउने हो कि ।’

स्रोत व्यवस्थापनको अवस्था हेर्दा राजस्वको लक्ष्यचाहिँ पूरा हुन खासै समस्या नआउने उनको भनाइ छ ।

अर्का विश्लेषक डा. डिल्लीराज खनालले भने बजेट निकै सन्तुलित भएको तर्क गरे । उनले भने, ‘यर्थापरक बजेट, सामाजिक कुरालाई व्यवस्थापन गर्ने न्ययोचित बजेट हो यो पटकको । राजश्वको व्यवस्थापन पनि सजिलोसँग हुन्छ ।’

सरकारले आगामी आर्थिक वर्ष २०७५/२०७६ को बजेटमा वार्षिक नीति तथा कार्यक्रम कार्यान्वयनका लागि १३ खर्ब १५ अर्ब १६ करोड १७ लाख विनियोजन गरेको छ ।

कूल विनियोजित बजेटमध्ये चालूतर्फ ८ खर्ब ४५ अर्ब ४४ करोड, पूँजीगत (विकास)तर्फ ३ खर्ब १३ अर्ब ९९ करोड ८१ लाख र वित्तीयतर्फ १ खर्ब ५५ अर्ब ७१ करोड ७० लाख विनियोजन गरिएको छ ।

सरकारले स्रोत व्यवस्थापनमा राजस्व ८ खर्ब ३१ अर्ब ३१ करोड ८० लाख, वैदेशिक अनुदानबाट ५८ अर्ब ८१ करोड ५५ लाख अनुमान गरिएको छ । ४ खर्ब २५ अर्ब २ करोड ४२ लाख न्युन भएको वैदेशिक तथा आन्तरिक ऋण तथा अनुदानमार्फत पूर्ति गर्ने उल्लेख गरिएको छ ।