धनगढी, २२ जेठ – सदैव कुटनीतिक वाक्यांशबाट भाषण शुरु गर्ने नेता भीम रावल पार्टी कार्यकर्ता भेलामा निकै प्रफूल्लित देखिए । तत्कालीन नेकपा एमाले र माओवादी केन्द्रबीच एकतापछि गठित नेपाल कम्यूनिस्ट पार्टी (नेकपा) का स्थायी कमिटी सदस्य रहेका नेता रावल देशप्रेम र समाजवादी भावनाले ओतप्रोत कविताबाट प्रस्तुत भए ।

धनगढीमा आयोजित प्रदेश स्तरीय पहिलो कार्यकर्ता भेलाको औपचारिक सत्रकै क्रममा कविता फुरेको बताउँदै उनले कविताबाटै भाषणको उठान गरे । पार्टी एकताले हर्षित रहेका उनले यसरी मनको भाव पोखे, ‘जतिबेला मान्छे धेरै दुखी हुन्छ, धेरै खुशी हुन्छ । उसको मनमा लहरहरू उत्पन्न हुन्छन् । त्यतिबेला मान्छेहरू कविता लेख्छन् । गीत खेल्छन् । गुनगुनाउँछन् । सामान्य शब्दमा व्यक्त गर्न सकिन्न । त्यसकारण मैले पनि बस्दाबस्दै २ शब्द कोरेको छु ।’

मिलेका छन् सागर विशाल
लहर निकाली नयाँ
गौरव हिमालको राखी
उज्यालो फैलाउँदै यहाँ
बढाउन सकौं हामी सबले
स्वाभिमान यो देशको
ढोका खोलेर समृद्धिसितको
अनुनय यो गर्दछ
मिलेका यी हातहरू सधै
भैरहुन् सधैं सबल
समाजवादी गन्तव्य महान
नहोस् कतै अलमल ।।

नेता भीम रावलका कविता कहिल्यै नसुनेका कार्यकर्ता एकाएक कविता सुनेपछि चकित भए । भेलाको प्रमुख अतिथि समेत रहेका उनले अधिकांश समय पार्टी एकताकै सेरोफेरौमै खर्चे । २ कम्यूनिस्ट पार्टी एकताले शान्ति र विकासको सन्देश दिएको बताउँदै उनले पार्टी एकतालाई ऐतिहासिक भएको समेत दावी गरे । जसले देशलाई समाजवादको उज्यालो गन्तव्यतिर लैजाने समेत उनले विश्वास व्यक्त गरे ।

उनले ७ नम्बर प्रदेश साधन स्रोतले सम्पन्न रहेको चर्चा गरे । ‘यहाँ सबथोक छ । यार्चागुम्बा, पाँचऔले, पदमचाल लगायत बहुमूल्य जडिबुटी यही पाइन्छ, काठमाडौंमा होइन । पश्चिम सेती यही छ, चाँदीझैं चम्किने हिमाल, हरिया डाँडाकाँडाले भरिएको पहाड, उर्वर भूमी यही छ,’ उनले अगाडि भने, ‘अब हामी समृद्धिको गन्तव्य तय गरिसकेका छौं ।’

उनले अब मुलुकमा विकास र शान्ति भएन भनेर पन्छिने छुट कसैलाई नरहेको बताए । सामुन्ने बसेका मुख्यमन्त्री त्रिलोचन भट्टसहित अन्य मन्त्रीलाई इङ्गित गर्दै उनले भने, ‘मुख्यमन्त्री ज्यू यही हुनुहुन्छ । मन्त्रीहरू पनि यही हुनुहुन्छ । विकास भएन । काम भएन भनेर कोही पनि छुट पाउने छैन ।’ राज्यको महत्वपूर्ण निकायमा रहेका प्रमुख तथा पार्टीका नेता कार्यकर्तालाई पार्टीको एकीकृत राजनीतिक प्रतिवेदन, चुनावी घोषणापत्र अध्ययन गरेर काम गर्न निर्देशन दिए ।

कार्यक्रमका विशेष अतिथि स्थायी समितिका अर्का सदस्य लेखराज भट्टले ७ नम्बरमाथि फेरि पनि विभेद जारी रहे विद्रोह गर्ने चेतावनी दिए । पार्टी एकतापछि कार्यकर्ता व्यवस्थापन चुनौतिपूर्ण रहेको भन्दै उनले नयाँ पार्टीलाई नयाँ सोचका साथ अगाडि लैजानुपर्नेमा जोड दिए ।