बुटवल, २५ जेठ – जीप चलाइरहेको बेला बससँग ठोक्किएर गम्भीर घाइते भएका पश्चिमाञ्चल क्षेत्रीय ट्राफिक प्रहरी कार्यालय बुटवलका प्रहरी नायव निरीक्षक (सई) पोमनारायण खनालको आज मृत्यु भएको छ ।

जेठ २० गते बुटवलको धागो कारखाना नजिकै आफूले चलाइरहेको जीप यात्रुबाहक बससँग ठोक्किएर दुर्घटना हुँदा उनी गम्भीर घाइते भएका थिए । बुटवलमा उपचार हुन नसकेपछि काठमाडौं पुर्याइएका खनालको उपचारको क्रममा आज बिहान मृत्यु भएको प्रहरीले जनाएको छ ।

दुर्घटनालगत्तै क्रिमसन अस्पताल मणिग्राममा प्रारम्भिक उपचारपछि उनलाई थप उपचारका लागि काठमाडौंको ग्राण्डी हस्पिटलमा रेफर गरिएको थियो । ४० वर्षीय खनाल ट्राफिक प्रहरीमा लामो समयदेखि कार्यरत थिए ।