काठमाडौं, २९ जेठ – अमेरिकाका राष्ट्रपति डोनल्ड ट्रम्पले उत्तर कोरियाका नेता किम जोङ–उनलाई पूर्वयोजना अनुसार सिंगापुरमा मंगलवार भेटेका छन् । त्यस भेटघाटका क्रममा देखिएका पाँच रमाइला दृश्य यस्ता छन् ः

झण्डा
अमेरिकी र उत्तर कोरियाली झण्डाहरू लहर मिलाएर पृष्ठभूमिमा राखिएको थियो अनि त्यसको अघिल्तिर दुई नेताले हात मिलाए र क्यामराका अगाडि पोज दिए । यो दृश्य आकर्षक थियो र किमका लागि यो ठूलो विजय हो किनकि उनी अमेरिकी राष्ट्रपतिको बराबरीको हैसियतमा देखिए । 

कदमचाल
ट्रम्प होटलबाट पहिले नै निस्के तर किमभन्दा सात मिनेटपछि पुगे । उत्तर कोरियाका नेता ट्रम्पअघि नै पुगेर उनलाई कुर्नु जेष्ठ नागरिकप्रतिको सम्मान थियो । दुवैजना सँगै बाहिर आए अनि ट्रम्पले हात मिलाउनका लागि पहिल्यै हात बढाए । 

हस्तमिलन
दुई देशका झण्डाको पृष्ठभूमिमा ट्रम्प र किमले हात मिलाए । दुईजनाले एकअर्कासँग कुराकानी गर्न खोजे तर त्यो त्यति सुहाउँदो देखिएन । किमले ट्रम्पलाई अंग्रेजीमा ‘तपाईंलाई भेट्दा खुशी लाग्यो, राष्ट्रपतिज्यू’ भनी अभिवादन गरे । हस्तमिलन १२ सेकेन्डसम्म चल्यो । ट्रम्पले संयमित भएर हात मिलाए, अरू नेताको हात तानेको जस्तो उनले गरेनन् । हस्तमिलनका बेलामा ट्रम्पले किमको कुहिनो कमलो तवरले समाते ।

भाषा
ट्रम्पले किमसँगको भेटघाट गौरवशाली भएको बताए र आफूहरूबीच गजबको सम्बन्ध बन्नेमा कुनै शंका नरहेको कुरा व्यक्त गरे । त्यतिखेरै किमले पुराना पूर्वाग्रह र अभ्यासका कारण अमेरिका तथा उत्तर कोरियाबीचको सम्बन्ध दशकौंदेखि गतिरोधको स्थितिमा रहेको भनी स्वीकारे । 

एकान्तिक वार्ता
ट्रम्प र किमले अनुवादकको सहारा लिएर लगभग ४० मिनेट जति वार्ता गरे । त्यसपछि ट्रम्पले आफूहरूबीच ‘उत्कृष्ट सम्बन्ध’ बनेको बताए । किम आणविक हतियार त्याग्ने विषयमा इमान्दार छन् कि छैनन् भन्ने कुरा आफूले एक मिनेटमा बताउन सक्ने ट्रम्पले यसअघि टिप्पणी गरेका थिए ।

द गार्डियनबाट