धनगढी, ३१ जेठ – सरकारले मुक्त घोषणा गरेको ५ वर्ष बितेपनि कैलाली जिल्लास्थित २८ जना किशोरी अझै कमलरीको रुपमा काममा राखिएको पाइएको छ ।

मुक्त कमलरी विकास मञ्च कैलालीले हालै सार्वजनिक गरेको तथ्याङ्क अनुसार विभिन्न सरकारी तथा गैरसरकारी निकायमा कार्यरत व्यक्ति, व्यापारी लगायतले विभिन्न बहानामा कमलरी राखेको पाइएको हो । कमलरी राख्नेमा अधिकांश शिक्षक, व्यापारी, प्रहरी, सरकारी कर्मचारी, कृषक, होटल व्यवसायी, नेतालगायत रहेका छन् ।

मञ्चकी केन्द्रीय सचिव सुजाता चौधरीका अनुसार धनगढीस्थित मोडर्न एरा बोडिङ स्कूलका सञ्चालक तथा प्याब्सन कैलालीका पूर्वअध्यक्ष आरसी यादवले २०५९ सालदेखि कमलरी राखेका छन् । उनले धनगढी–८ धनगढी गाउँकी १८ वर्षीया पूजा चौधरीलाई वार्षिक ३० हजार ज्याला दिने गरी कमलरी राखेको केन्द्रीय सचिव चौधरीले बताइन् ।

नेपाल प्रहरीमा कार्यरत धनगढी उत्तरबेहडीका जनक कुवँरले कैलारी गाउँपालिका–२ लक्कडकी १७ वर्षीया आरती चौधरीलाई ४ वर्षदेखि कमलरी राखेका छन् । थारु अगुवा तथा नेपाल टेलिकममा कार्यरत चन्द्रसिंह चौधरीले धनगढी गाउँकै १५ वर्षीया सुजिता चौधरीलाई कमलरी राखेको पाइएको छ । कमलरी राख्नेले न्यून ज्याला तथा जिन्सी पदार्थ दिने गरेर कमलरी राखेको पाइएको छ । वार्षिक १ क्वीन्टल चामलदेखि थोरै पारिश्रमिक दिने गरी कमलरी राखिएको सो तथ्याङ्कमा उल्लेख छ । 

तथ्याङ्क अनुसार कैलारी गाउँपालिका–२ की १४ वर्षिया जामुना चौधरी, १४ वर्षीय आरती चौधरी, १३ वर्षीय आरती चौधरी र ११ वर्षीय मनिषा चौधरी कमलरीको रुपमा काम गरिरहेकी छिन् । उनीहरू जिल्लाको लोहागर, धनगढीको उत्तरबेहडी, धनगढी गाउँ र मनेहरामा कमलहरीको रुपमा काम गरिरहेको मञ्चकी केन्द्रीय सचिव सुजाता चौधरीले बताइन् ।

धनगढी उपमहानगरपालिका–८ की १८ वर्षकी पूजा चौधरी, १५ वर्षकी सुजिता चौधरी र १२ वर्षकी शर्मिला चौधरी पनि कमलरीको रुपमा काम गरिरहेकी छिन् । भजनी नगरपालिका–८ की १४ वर्षकी गीता, कुमारी चौधरी, बर्दगोरिया गाउँपालिका–४ की १६ वर्षकी निरुता चौधरी, वडा–२ की १८ वर्षकी अस्मिता चौधरी पनि कमलरीको रुममा रहेकी छिन् ।

तथ्याङ्क अनुसार सबैभन्दा धेरै ८ जना लम्कीचुहा नगरपालिका क्षेत्रका किशोरी कमलहरीको रुपमा काम गरिरहेको तथ्याङ्कमा उल्लेख छ । लम्कीचुहा नगरपालिकाको गप्काकी १३ वर्षीया निशा चौधरी, १६ वर्षीया पवित्रा चौधरी, १४ वर्षीया सचित चौधरी र १८ वर्षीया गीता चौधरी रहेकी छिन् । लम्कीचुहा नपा–३ की १६ वर्षीया कविता डंगौरा, १४ वर्षकी सुविता डगौंरा, वडा–१ की १६ वर्षीया मञ्जु चौधरी, बलचौरकी १८ वर्षीया जुनी चौधरी पनि कमलरीको रुपमा काम गरिरहेकी छिन् ।

बर्दगोरिया गाउँपालिका–४ नौनियाकी १६ वर्षिया निरुता चौधरी, वडा नम्बर–२ दोदोधराकी १८ वर्षीया अस्मिता चौधरी पनि कमलरीको रुपमा काठमाडौं र सुर्खेतमा लगिएको जनाइएको छ । टीकापुर नगरपालिका–१ की १७ वर्षीया सपना चौधरी, १५ वर्षीया पूजा चौधरी र १४ वर्षीया सुस्मिता चौधरी पनि कमलहरी बनेकी छिन् । 

जानकी गाउँपालिका–६ की २१ वर्षीया सन्तोषी चौधरी, वडा नम्बर–१ की १३ वर्षीया सन्जु चौधरी, १४ वर्षीया सुमती चौधरी र १५ वर्षीया झुमा चौधरी कमलरी बनेकी छिन् । जोशीपुर गाउँपालिका–५ की २० वर्षीया शोभा चौधरी, १७ वर्षीया सिर्जना चौधरी र वडा नम्बर–४ की २५ वर्षीया लाली चौधरी कमलरी बनेकी छिन् । 

सरकारले २०७० असार १३ गते मुक्त कमलरी घोषणा गरेको थियो । तर, अझै पनि कमलरी राखेको पाइएको छ । तराईको कैलाली, कञ्चनपुर, बाँके, बर्दिया र दाङ जिल्लास्थित थारु समुदायका किशोरीलाई विभिन्न बहानामा कमलरी राखेको पाइएको छ । यसैबीच, कैलालीका प्रमुख जिल्ला अधिकारी ऋषिराम तिवारीले तत्कालै सम्बन्धित स्थानीय तहसँग समन्वय गरेर उनीहरूको उद्दार तथा पुनस्र्थापनाको काम अगाडि बढाइने बताए । ‘कमलरी राख्नेलाई कानून बमोजिम कारवाही गरिने छ,’ उनले भने ।