विराटनगर, ५ असार – जुन २१ तारिखमा मनाइने विश्व योग दिवसको अवसरमा १ नम्बर प्रदेश सरकारले बराह क्षेत्र चतरामा बृहत् योग शिविर आयोजना गर्ने भएको छ ।

सामाजिक विकास मन्त्रालयको अगुवाइमा योग शिविर आयोजना गर्न लागिएको हो । १ नम्बर प्रदेशका मोरङ, सुनसरी तथा उदयपुरका स्थानीय तहका प्रमुख समेतको उपस्थिति रहने गरी १ हजार ५ सय बढी साधकको योग शिविरमा सहभागी गराउने गरी तयारी भइरहेको सामाजिक विकास मन्त्रालयले जनाएको छ । सामाजिक विकास मन्त्री जीवन घिमिरेले मन्त्रालय स्तरबाट धार्मिक पर्यटकीयस्थल बराहक्षेत्र चतरामा योग शिविरको आयोजना गर्न लागिएको जानकारी दिए ।

‘सबै नागरिक स्वस्थ रहनुपर्छ भन्ने हाम्रो मान्यता हो,’ मन्त्री घिमिरेले भने, ‘योगको माध्यमबाट पनि धेरै खालका रोगको उपचार हुने विश्वास रहिआएकाले हामीले योग दिवसलाई भव्य मनाउन खोजेका हौं ।’ शिविरमा १ नम्बर प्रदेशका मुख्यमन्त्री शेरधन राई, मन्त्रीहरू जीवन घिमिरे, इन्द्र आङबो, जगदिश कुसियैत, हिक्मत कार्की लगायतको मन्त्रीमण्डलको टीम नै सहभागी हुन बताइएको छ । 

स्थानीय जनप्रतिनिधि, प्रदेश सभाका सदस्य, प्रहरी अधिकारी, व्यावसायी, पर्यटन क्षेत्रका व्यक्ति लगायतलाई धेरै स्थानबाट योग शिविरमा उपस्थित गराउने मन्त्रालयको तयारी छ । हरेक वर्ष जुन २१ तारिखलाई विश्व योग दिवसको रुपमा मनाइँदै आएको छ ।

विश्व योग दिवसको अवसर पारेर चतरामा दिवसलाई भव्य रुपमा मनाउन लागिएको मन्त्रालयले जनाएको छ । दिवस मनाउने बारेमा मन्त्रालय स्तरबाट तयारी तीब्र पारिएको छ । १ नम्बर प्रदेशलाई स्वस्थ रहन योग भन्ने मूल नाराका साथ शिविरको आयोजना गरिएको हो ।