संसार छाडेका डा. देवकोटाको शिरमा देशको माया !

असार ५, २०७५

काठमाडौं, ५ असार– स्वदेशमै देहत्याग गर्ने इच्छा अनुरुप आफैंले स्थापना गरेको बाँसवारीस्थित न्युरो अस्पतालमा उपचारकै क्रममा दिवंगत भएका डा. उपेन्द्र देवकोटाको शव आज दिउँसो श्रद्धाञ्जलिका लागि अस्पतालमै राखियो । अस्पतालमै पुगेर उच्च पदस्त व्यक्तित्व, राजनीतिक नेतृत्व, सहकर्मी, आफन्त र सर्वसाधारणले देवकोटाको योगदानलाई सम्झिँदै श्रद्धाञ्जलि अर्पण गरे ।

पित्त थैलीको क्यान्सरबाट पीडित देवकोटाको सोमवार साँझ ५ः३५ बजे अस्पतालमा निधन भएको थियो । बेलायतमा ६ महिनाभन्दा लामो समय उपचार गर्दा पनि निको नभएपछि देवकोटाकै इच्छा अनुसार उनलाई बैशाख पहिलो साता नेपाल ल्याइएको थियो । देवकोटा जन्मभूमि र मातृभूमिलाई अत्यन्तै प्रेम गर्ने र प्राथमिकतामा राख्ने गर्थे । देहत्याग गर्नुभन्दा केही दिनअघि जन्मभूमि गोरखा पुग्ने इच्छा व्यक्त गर्नु र परिवारले इच्छा पूरा गरिदिनुले मातृभूमिप्रति देवकोटाको लगावलाई प्रमाणित गर्छ ।


ADVERTISEMENT

श्रद्धाञ्जलिका लागि राखिएको देवकोटाको पार्थिव शरीरको शिरमा लगाइएको ढाकाटोपीले राष्ट्रप्रतिको सम्मानलाई झल्काउँथ्यो । ढाकाटोपीले स्वर्गारोहणपछि पनि उनको अनुहार जाज्वल्य देखिन्थ्यो । पार्थिव शरीरको सामुन्ने भित्तामा टाँसिएको देवकोटाको हँसिलो तस्बिरले ‘देवकोटा अझै जिउँदै छन् कि !’ भन्ने गहिरो भान हुन्थ्यो । अद्भूत प्रतिभाका कारण विदेशमै आकर्षक अवसर हुँदाहुँदै पनि नेपाली बिरामीको सेवा गर्ने उद्देश्यका साथ देवकोटाले स्वदेशलाई नै कर्मथलो रोजेका थिए ।

पितृशोकको गहिरो पीडामा समेत देवकोटाका छोरीले आफूलाई सम्हालेर समवेदना ग्रहण गरिरहेका थिए । छोरीहरू मेघा, बसुधा र मञ्जरी दिवंगत बुबाको पार्थिव शरीर अगाडि मिल्दोजुल्दो पोशाकमा देखिन्थे । अस्पतालका अनुसार देवकोटा पत्नि डा. मधु दिक्षित देवकोटासहित ३ वटै छोरीले काजकिरीया गर्ने छन् । देवकोटाको काजकिरीया ७ दिनमा पूरा गरिने छ । आज (बुधवार) दिउँसो १ बजेसम्म देवकोटालाई श्रद्धाञ्जलिका लागि राखेपछि आजै पशुपति आर्यघाटमा विद्युतीय माध्यमबाट दाहसंस्कार गरिँदैछ । देवकोटाको निधनले स्वास्थ्य क्षेत्रमा ठूलो क्षति पुगेको छ । डा. देवकोटाप्रति हार्दिक श्रद्धाञ्जलि !
 

असार ५, २०७५ मा प्रकाशित

गगन अर्याल

अर्याल लोकान्तरका फोटो पत्रकार हुन् ।

लेखकबाट थप...

प्रतिक्रिया दिनुहोस