खोटाङ– दिक्तेल रुपाकोट मझुवागढी नगरपालिकाको तेस्रो नगरसभाले आर्थिक वर्ष २०७५÷०७६ को लागि रु ६८ करोड ६० लाख ९६ हजार बजेट पारित गरेको छ । 

नगरपालिकाको प्रथम आवधिक योजनाले निर्देशित गरेका लक्ष्यहरूलाई मध्यनजर गर्दै स्थानीय प्राथमिकता र आवश्यकतालाई केन्द्रमा राखेर तयार गरिएको वार्षिक नीति तथा कार्यक्रम नगरसभाले आज पारित गरेको हो । 

‘समाजवाद उन्मुख, सभ्य र समृद्ध नगर, दिक्तेल रुपाकोट मझुवागढीवासीको रहर’ भन्ने मूलनाराका साथ आज उद्घाटन भएको कार्यक्रममा नगर उपप्रमुख विणादेवी राईले नीति तथा कार्यक्रम प्रस्तुत गर्नुभएको थियो । चालु आर्थिक वर्ष २०७४÷०७५ को आन्तरिक आयतर्फ रु ११ लाख ८७ हजार र संघीय सरकारको अनुदानतर्फ रु ५८ करोड ५१ लाख ६३ हजार गरी कुल रु ५८ करोड ६३ लाख ५० हजार मध्ये रु ५४ करोड ७३ लाख ५४ हजार खर्च भएको उपप्रमुख राईले प्रस्तुत गर्नुभएको नीति तथा कार्यक्रममा उल्लेख छ । 

प्रस्तुत बजेटले दिगो र गुणस्तरीय पूर्वाधार विकास, सामाजिक विकास, सामाजिक न्याय तथा लैङ्गिक मूलप्रवाहीकरण, कृषि, पशुपंक्षी, सहकारी, उद्यममार्फत रोजगारी र उत्पादनमा वृद्धि, वातावरण संरक्षण र हरियाली तथा सौन्दर्य प्रवद्र्धन र संस्थागत विकास र सेवा प्रवाहमा क्षमता विकासलाई प्रमुख प्राथमिकता दिइएको छ । 

बिनियोजित बजेटले निर्माणतर्फ निर्माणाधीन मध्यपहाडी लोकमार्ग, निर्माणाधीन महुरे–फोक्सिङ्टार सडक, ऐतिहासिक, धार्मिक तथा साँस्कृतिक महत्व बोकेको हलेसी, मझुवागढी, माहुरेगढी, रुपाकोट, भुलभुले लगायत जिल्ला र नगरभित्र रहेका पर्यटन विकासको सम्भावना बोकेका स्थानहरूलाई प्राथमिकतामा राखेको छ ।