काठमाडौं – पाकिस्तानका पूर्वप्रधानमन्त्री नवाज शरीफले भ्रष्टाचारको मुद्दामा अदालतले आफूविरुद्धको फैसलालाई चुनौती दिँदै त्यसलाई खारेज गर्ने काग गरेका छन् । 

भ्रष्टाचारको एक मुद्दामा शरीफलाई १० वर्षको अनि उनकी छोरी मरियमलाई सात वर्षको कारागार सजाय दिइएको छ । 

भ्रष्टाचारप्रतिरोधी अदालतले शरीफकी छोरी मरियमविरुद्ध लन्डनमा चार विलासी फ्ल्याटसँग सम्बन्धित मुद्दामा सजाय सुनाएको हो । दुवै शुक्रवार लन्डनबाट पाकिस्तान फर्केका हुन् । 

अहिले दुवैलाई इस्लामाबाद नजिकैको अदियाला कारागारमा थुनिएको छ । उनीहरूले त्यहीँ बसेर भ्रष्टाचारका दुई अन्य मुद्दा पनि सामना गर्दैछन् । 

शरीफमाथि आयभन्दा बढी सम्पत्ति राखेको आरोप छ । तीनचोटि प्रधानमन्त्री बनिसकेका शरीफले यो राजनीतिक प्रतिशोध लिनका लागि लगाइएको आरोप भएको बताएका छन् । 

उनलाई राष्ट्रिय जवाफदेहिता ब्युरोलाई सहयोग नगरेकोमा एक वर्षको अतिरिक्त सजाय दिइएको छ । उनका ज्वाईंलाई पनि एक वर्षको सजाय दिइएको छ ।

अदालतले शरीफमाथि ८० लाख पाउन्ड र मरियममाथि २० लाख पाउन्ड जरिवाना पनि लगाएको छ । 

शरीफका वकिलले इस्लामाबाद उच्च न्यायालयमा निवेदन दर्ता गरेर नवाज शरीफलाई दोषमुक्त गर्न र उनीविरुद्धका सबै आरोप खारेज गर्न माग गरेका छन् । चार वरिष्ठ वकिलले यो निवेदन दिएका हुन् । तर अदालतले यो निवेदन स्वीकार गरेको छैन । स्वीकार गरेपछि मात्र सुनुवाइको मिति तोकिनेछ । 

सन् २०१६ मा पनामा पेपर केसमा नाम आएपछि नवाज शरीफले सन् २०१७ को जुलाईमा प्रधानमन्त्री पदबाट राजीनामा दिएका थिए । अनुसन्धानपछि शरीफ र उनकी छोरीविरुद्ध सम्पत्ति शुद्धीकरणको मुद्दा पनि लगाइएको थियो । 

पाकिस्तानी ट्राइब्युनल कोर्टले शरीफ र उनकी छोरी मरियमलाई दोषी ठहर गरेर कैद सजाय तोकेको थियो । दुवै त्यतिखेर लन्डनमा भएकाले अनुपस्थितिमै सजाय सुनाइएको थियो ।

एजेन्सी