काठमाडौं – चीनले आफूलाई खतरा हुने सबै कुरालाई रोक्न हरसम्भव प्रयास गरिरहेको हुन्छ । त्यसो गर्दा संसारमा जतिसुकै बबाल मच्चिएपनि मतलब गर्दैन । 

चीन अहिले मुसलमान धर्मलाई जरैबाट उखेल्न काम गरिरहेको देखिन्छ । केही समयअघि चीनले इस्लाम अनुसरण नगर्न र मार्क्सवादी विचारधारा मान्न देशवासीलाई चेतावनी दिएको थियो । त्यसको विरोध संसाभरि भयो । 

शिङजियाङ प्रान्तमा उसले मुसलमानमाथि कडाइ गरेपछि अब गान्सु प्रान्तमा पनि मुसलमान बच्चाहरूलाई धर्म र इस्लामिक शिक्षाबाट टाढा राख्नका लागि चिनियाँ सरकारले आदेश जारी गरेको छ । 

त्यसो त चीनमा मुसलमानहरूको संख्या कम छ । शिन्जियाङ प्रान्तमा उइघुर समुदायका मुसलमान बहुसंख्यक छन् तर उनीहरूविरुद्ध पहिलेदेखि नै चीन सरकारले उनीहरूको दायरा सीमित गरेको छ । 

नयाँ आदेशअनुसार, गान्सुमा १६ वर्षभन्दा कम उमेरका बच्चाहरूलाई इस्लामिक शिक्षाबाट टाढा राखिएको छ । सरकारले ध्वनि प्रदूषण भएको भन्दै सबै ३५५ मस्जिदबाट  लाउडस्पीकर हटाउन आदेश दिएको छ । 

मस्जिदमाथि चीनको राष्ट्रिय झण्डा राख्ने आदेश पनि दिइएको छ । अनि मुसलमान पुरुषलाई दाह्री राख्न पनि प्रतिबन्ध लगाइएको छ । 

लिटिल मक्का पनि भनिने गान्सुमा गर्मी र जाडोको छुट्टीमा एक हजारभन्दा धेरै बच्चाहरू कुरान पढ्नका लागि मस्जिद आउँछन् तर चीन सरकारले यसमा पनि प्रतिबन्ध लगाएको छ । बच्चाहरूलाई कुरान नपढाउँदा फाइदा हुने सरकारको तर्क छ । 

विद्यालयमा धर्मनिरपेक्ष पाठ्यक्रम अपनाउन भनिएको छ । उइघुर समुदायका मानिस सरकारको यस्ता आदेशका कारण उग्र भएका छन् । 

एजेन्सी