काठमाडौं – फ्रान्स २० वर्षपछि दोस्रोपटक फूटबलको विश्वविजेता बन्नमा एक महामन्त्रको योगदान छ । त्यो मन्त्र हो – ट्यालेन्ट, टीमवर्क र टुगेदरनेस । 

सन् २०१८ को विश्वकपमा फ्रान्सेली टोलीसँग ट्यालेन्टेड वा प्रतिभाशाली खेलाडीहरू भरपूर थिए । अनि ती खेलाडीहरूमा टुगेदरनेस वा एकजुटताको भावना थियो । अनि उनीहरू मिलेर टीमवर्क वा समूहमा जस्तो भूमिकामा खेल्नुपर्ने हो त्यसरी नै खेलेर विश्वविजेता बनेका हुन् ।

दक्षिण अफ्रिकामा सन् २०१० मा भएको विश्वकपमा फ्रान्सेली टोलीले खासै राम्रो प्रदर्शन गरेको थिएन । व्यवस्थापक, प्रशिक्षण कर्मचारी र खेलाडीहरूबीचको झगडा सार्वजनिक भइरहेको थियो । प्रशिक्षक रेमु डोमनिच एक विभाजित टोली छोडेर हिँडेका थिए । 

अनि प्रशिक्षक बनेर आए डिडिएर डिशँप्स । उनले आफ्नो कार्यकालमा जीतका लागि खेलाडीहरूबीच सौहार्द्र बढाउनमा सबभन्दा बढी जोड दिए । टीमको एकता भंग गर्न खोज्ने खेलाडीलाई तत्कालै हटाइयो । 

फ्रान्सेली टोली आफ्नो बहुजातीय पहिचानका लागि प्रसिद्ध छ र यसलाई कालो गोरो अरबी टोली भनेर पनि चिनिन्छ । डिशँप्सले टीमको यो समृद्ध संस्कृतिलाई कमजोरी नभई शक्तिका रूपमा उपयोग गरे । यस्ता बहुजातीय खेलाडीको
समूहलाई मैदानभित्र र बाहिर एकजुट राख्नका लागि डिशँप्सले योगदान गरे । 

केही खेलाडीहरू आफू स्टार भएकाले बढी महत्त्व दिनुपर्ने भावना राख्थे भने पनि उनीहरूलाई टीमको हितका लागि आवश्यक पर्दा सहयोगात्मक भूमिका अपनाउन लगाइयो । पल पोग्बा र एन्टोइन ग्रीजम्यान जस्ता स्टार खेलाडीलाई पनि
यही भनियो । 

बेन्जामिन मेन्डीले विश्वकप जितेपछि ठीकै भनेका हुन्, ‘हाम्रो टोलीमा उत्कृष्ट खेलाडी मात्र छैनन्, सही रूपमा सबै खेलाडी परिवार झैं छन् ।’

एजेन्सी