काठमाडौं, ०६ असार- एन आई सीएशिया बैंक लिमिटेडले मिस्ड कल बैंकिङ सेवा संचालनमा ल्याएको छ ।  यो सेवाको सुरुवात सँगै बैंकका ग्राहकहरुले ब्यालेन्स सम्बन्धि  जानकारी, मिनी स्टेटमेन्ट जानकारी, कलब्याक सेवालगायतका जानकारी पाउनेछन् । ब्यालेन्ससम्बन्धि जानकारीका लागि ९८०१२२७७३३ मा मिस्ड कल गर्न बैंकले आग्रह गरेको छ ।   सोनम्बरमा मिस्ड कल गरे आफ्नो खातामा रहेको मौज्दातको जानकारी एसएमएस मार्फत प्राप्त गर्न सकिने ।

यस्तै मिनी स्टेटमेन्ट जानकारीका लागि मोबाईल नं– ९८०१२२७७४४ मा मिस्ड कल गरी खाताको अन्तिम ३ वटा कारोवारको जानकारी एसएमएस मार्फत प्राप्त गर्न सकिने र कलब्याक सेवाका लागि मोबाईल नं– ९८०१२२७७५५ मा मिस्ड कल गरी बैंकका सम्बन्धित कर्मचारीबाट कलब्याक मार्फत विभिन्न सुविधाको बारेमा जानकारी प्राप्त गर्न सकिने बैंकले जनाएको छ । 

अहिले मुलुकभर २ सय ३१ शखा कार्यालयहरु, २ सय २० एटिएम, १४ वटा एक्सटेन्सन काउण्टर एवं १५ वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गर्ने मुलुककै सबैभन्दा ठूलो शाखा सञ्जाल भएको बैंक हुन सफल भएको बैंकको दाबी छ ।

बैंकको वासलातको आकार रू. १ सय ७६ अर्ब भन्दा बढि पुगेको छ भने कुल निक्षेप करिब रू. १ सय ५० अर्ब पुगि निजी क्षेत्रबाट स्थापित बैंकहरु मध्ये नेपालको सबैभन्दा ठूलो बैंक तथा कुल कर्जा करिब रू. १ सय १९ अर्ब सहित निजी क्षेत्रका बैंकहरु मध्ये दोस्रो ठूलो बैंकको रुपमा बैंकले आफ्नो पहिचान बनाउन सफल भइसकेको छ । हालसम्म यस बैंकमा ग्राहकको संख्या करिब ११ लाख ७५ हजार रहेको बेंकले जनाएको छ ।