काठमाडौं – अयोध्याको राम जन्मभूमि बाबरी मस्जिद विवादमा हिन्दू र मुसलमानको दाबेदारीपछि अब बौद्ध समुदायले पनि दाबी गरेको छ । 

भारतको सर्वोच्च अदालतमा बौद्ध समुदायका केही मानिसले निवेदन दिएर यो विवादित जमीन बौद्धहरूको भएको तर्क गरे । 

उनीहरूले पहिला त्यहाँ बौद्धस्थल रहेको बताए । तर सर्वोच्च अदालतले बौद्धधर्मावलम्बीको निवेदनमा सुनुवाइ गर्न अस्वीकार गरेको छ । 

अयोध्यामा बस्ने विनीत कुमार मौर्यले सर्वोच्च अदालतमा निवेदन दिएका हुन् । विवादित स्थलमा भारतीय पुरातात्त्विक सर्वेक्षण विभागद्वारा चारचोटि गरेको उत्खननको आधारमा अघिल्लो हप्ता यो दाबी गरेका हुन् । 

बाबरी मस्जिद बनाइनुअघि त्यो ठाउँ बौद्धधर्मसँग जोडिएको निवेदनमा दाबी गरिएको छ । मौर्यले निवेदनमा जिकिर लिएका छन्, ‘पुरातात्त्विक विभागको उत्खननबाट त्यहाँ स्तूप, गोलाकार स्तूप, पर्खाल र खम्बा भएको देखिन्छ । त्यो बौद्ध विहार भएको स्पष्टै हुन्छ ।’

मौर्यले दाबी गरे, ‘अयोध्यामा उत्खनन गरिएका ५० खाल्डामा कुनै पनि मन्दिर वा हिन्दू ढाँचाका अवशेष भेटिएका छैनन् ।’

एजेन्सी