पर्वत – पर्वतको कुश्मा नगरपालिका–१४ का रक्त क्यान्सरबाट पीडित बालक अर्जुन गौतमको उपचारका लागि छिमेकी र गाउँवासीले आर्थिक सहयोग गरेका छन् । 

रक्त क्यान्सर पीडित अर्जुन बचाउ अभियानअन्तर्गत कुश्मा नगरपालिका वडा नं ११ र १४ वासी छिमेकी र गाउँलेबाट सङ्कलन गरिएको रकमको दोस्रो किस्ताबापतको आर्थिक सहयोग पीडितलाई हस्तान्तरण गरिएको छ । 

छिमेकी र गाउँले मिलेर गठन गरेको ‘अर्जुन बचाउ अभियान’ले सङ्कलन गरेको रु एक लाख ८८ हजार १७७ शनिबार हस्तान्तरण गरिएको स्थानीयवासी सुरेन्द्र शर्मा गौतमले जानकारी दिए । अभियानले गौतमको उपचारका लागि रु दुई लाख ८७ हजार ७७१ सङ्कलन गरेको थियो । पहिलो किस्ताको रकम यसअघि नै हस्तान्तरण गरिएको थियो । 

सहयोगका लागि स्थानीय गोविन्द पौडेलको अध्यक्षतामा मूल समिति गठन गरी देश विदेशमा सामाजिक सञ्जालसमेत प्रयोग गरी सहयोग सङ्कलन अभियान सञ्चालन गरिएको थियो ।

समितिले कसैले सहयोग रकम राखेको भए एक हप्ताभित्र परिवारलाई हस्तान्तरण गरिदिन अनुरोध गरेको छ । आर्थिक अवस्था कमजोर रहेका गौतमको उपचारका लागि विभिन्न संस्थाले अभियान सञ्चालन गरिरहेका छन् ।

उनको उपचारमा रु २० लाख खर्च लाग्ने बताइएको छ । अहिलेसम्म झण्डै रु १५ लाख सहयोग सङ्कलन भइसकेको छ ।

कुश्मा नगरपालिका–११ पकुवामा रहेको वीरेन्द्र माविमा कक्षा ९ मा अध्ययनरत् पीडित बालकको एक वर्षदेखि भरतपुर क्यान्सर अस्पताल चितवनमा उपचार भइरहेको छ ।