काठमाडौं – बुधवार सार्वजनिक भएको हिन्दी चलचित्र सत्यमेव जयते सिस्टमसँग लड्ने कथामा बनाइएको ताल न तुलको झुर फिल्म हो । मिलाप झावेरीको निर्देशनमा बनेको फिल्मको कथा प्रहरी बलमा फैलिएको भ्रष्टाचारवरिपरि घुमेको छ । 

कथा यसप्रकार छ : वीर (जोन अब्राहम) एक कलाकार हुन् तर उनी गुप्त हत्यारा पनि हुन् । उनी प्रहरीलाई जलाएर मार्छन् र मारेपछि उनीहरूको स्केच बनाउँछन् । प्रहरी बलले उनलाई पक्रिन नसकेपछि डीसीपी शिवांश (मनोज वाजपेयी) लाई बोलाएर वीरको केस सुम्पिइन्छ । शिवांश हल्यारालाई पक्रने कोशिश गर्छन् तर हत्यारा प्रहरीलाई मारिरहन्छन् । वीर किन हत्यारा बने त भन्ने कथा पनि छ ।

वीर खासमा राम्रो काम गर्ने मानिस हुन् जो आफ्नै तरिकाले प्रहरी बललाई भ्रष्टाचारमुक्त बनाउन चाहन्छन् । डीसीपी शिवांश एक इमान्दार प्रहरी अधिकारी हुन् जो हत्याराको दिमागमा चल्ने योजनालाई पहिल्याउँछन् । 

कथा यहाँ पुगेपछि अलमलिन थाल्छ । अब घटनाक्रमलाई कसरी अघि बढाउने भन्ने विषयमा पटकथाकार रनभुल्लमा परेको देखिन्छ । यो फिल्मले शुरूआत भव्य गर्छ तर एक विन्दुमा पुगेपछि कताकता बरालिन्छ ।

फिल्मको विषयवस्तु पुरानो छ र कथानकमा अब के हुन्छ भनी दर्शकले सजिलै पत्ता लगाइदिन्छ । निर्देशन र लेखन दुवै झुर छ । संवादहरूले फिल्ममा हास्य छर्छन् । तर गम्भीर दृश्यमा पनि हास्यास्पद संवाद राखिएको छ ।
फिल्मलाई गम्भीरतापूर्वक लिन असम्भव छ । 

अभिनयको कुरा गर्दा जोन अब्राहमबाट अभिनयको अपेक्षा गर्नु बेकार नै हो । उनी जतिखेर पनि हेभी मसल देखाउने र निधार खुम्च्याउने बाहेक केही गर्नै जान्दैनन् । पर्दामा आफू कुन दृश्य गर्दैछु, उनलाई कुनै मतलब छैन । हत्या
गर्दा पनि, रोमान्स गर्दा पनि उनको एक्सप्रेसन एउटै रहन्छ । 

फिल्मकी नायिका शिखा (आयशा शर्मा) लाई संसारको सबभन्दा असल महिला देखाइएको छ । उनी जनावरको हेरचाह गर्छिन्, समुद्री किनार सफा गर्छिन् र असहाय बच्चाहरूलाई पढाउँछिन् । आयशाले राम्रो अभिनय गरेकी छन् । 

मनोज वाजपेयीले आफ्नो भूमिकालाई न्याय गरेकी छन् । तर फिल्मका वाहियात घटनाले उनको शानदार अभिनयलाई दबाइदिन्छन् । 

फिल्ममा नोरा फतेहीको आइटम नम्बर दिलबर दिलबर राम्रो छ । अनि आतिफ असलमले पानियों सा गीत मीठो गाएका छन् । 

यो फिल्म हेरेर आफ्नो समय र पैसा बर्बाद नगर्नुस् ।

फिल्म : सत्यमेव जयते
स्टारकास्ट : जोन अब्राहम, मनोज वाजपेयी, आयशा शर्मा
निर्देशक : मिलाप झावेरी
निर्माता : निखिल आडवाणी, भूषण कुमार
रेटिङ : १.५/५

दैनिक भास्करमा प्रकाशित समीक्षा