काठमाडौं – पोल्यान्ड पठाउने भन्दै नेपाली युवालाई ठग्ने २ युक्रेनी नागरिक बुधवार पक्राउ परेका छन् ।

पर्यटक भिषामा नेपाल आएका विल्ली भिटाली र उनकी महिला सहयोगी नाटालियाले कामदार भिषामा पोल्यान्ड पठाउने भन्दै ठगी गरेको भेटिएपछि उनीहरूलाई पक्राउ गरिएको हो ।

उनीहरूको विषयमा श्रम मन्त्रालयमै सूचना आएपछि वैदेशिक रोजगार विभाग र अपराध अनुसन्धान महाशाखाले छापा मारेको थियो ।

पुतलीसडकस्थित शंकरदेव क्याम्पसअगाडि कार्यलय नै सञ्चालन गरेर उनीहरूले ठगी धन्दा चलाइरहेको पाइएको प्रहरीले जनाएको छ ।

उनीहरूले पिपुल फर वर्क नामको कम्पनी नै दर्ता गरी काम गरिरहेको पाइयो ।

फेसवुक, ट्वीटरलगायतका सामाजिक सञ्जालमार्फत प्रचार गरेर उनीहरूले नेपालीलाई आफ्नो फन्दामा पार्ने गरेका थिए ।

सम्पर्कमा आउनेहरूसँग शुरुमै २ लाख रुपैयाँ माग्ने गरेका उनीहरूले अन्तिम अन्तर्वार्ताका लागि भारत जानुपर्ने र ७ लाख खर्च लाग्ने बताउने गरेका थिए ।

उनीहरूको कार्यालयबाट सम्पूर्ण कागजात नियन्त्रणमा लिएर प्रहरीले अनुसन्धान थालेको छ ।