काठमाडौं – भयंकर आर्थिक संकट बेहोरिरहेको दक्षिण अमेरिकी मुलुक भेनेजुएलाले महंगीको सामनाका लागि आफ्नो मुद्रा ९५ प्रतिशतसम्म अवमूल्यन गरेको छ । यसबाहेक भेनेजुएला सरकारले न्यूनतम ज्यालामा तीन हजार प्रतिशतसम्म बढाउने तयारी गर्दैछ । 

भेनेजुएलाका राष्ट्रपति निकोलस मदुरोले आकाश छोएको महंगीमा नियन्त्रणका लागि चालिएको कदम बताएका छन् । 

आर्थिक उद्धारका लागि अनेकौं कदम उठाइने भएको छ । कर बढाउने, केही चालकका लागि पेट्रोलको मूल्य बढाउने अनि नयाँ मुद्रा ल्याउने काम भइरहेको छ । भेनेजुएलाको नयाँ मुद्रा सोभरेन बोलिभरमा अब पहिलेको मुद्राको
तुलनामा पाँच शून्य कम हुनेछन् । अब भेनेजुएलामा आर्थिक चमत्कार हुने मदुरोले बताए । 

भेनेजुएलामा महंगी धेर बढेर एक किलो मासुका लागि ९५ लाख बोलिभर तिर्नुपरेको छ । एक कप कफीका लागि मानिस २५ लाख बोलिभर तिरिरहेका छन् ।

खाद्य संकट र औषधिको कमीका कारण भेनेजुएलाका पाँच लाखभन्दा बढी नागरिक देश छोडेर भागेका छन् । अन्तर्राष्ट्रिय मुद्रा कोषले अनुमान गरेअनुसार, भेनेजुएलामा यसै वर्षको अन्त्यसम्ममा महंगी १० लाख प्रतिशतको दरमा
बढ्नेछ । 

आईएमएफको भविष्यवाणीपछि राष्ट्रपति निकोलस मदुरोले देशको बोलिभर मुद्रामा एक लाख मूल्य भएको नोटबाट पाँच शून्य हटाउने घोषणा गरेका थिए । अब एक लाखको नोटको मूल्य एक बोलिभर हुनेछ । 

तर अर्थशास्त्रीहरू र विपक्षी दलका सदस्यहरूलाई यो योजनाबाट आर्थिक संकट सकिनेमा विश्वास छैन । भेनेजुएलामा को बन्छ करोडपति भन्ने शो नै बन्द भयो किनकि पुरस्कार राशिको कुनै मूल्य नै रहेन ।

एजेन्सी