काठमाडौं – कालीमाटीस्थित फलफूल तथा तरकारी बजारमा सोमवारदेखि शुरू भएको तनाव मंगलवार पनि जारी छ ।

सोमवार एकाबिहानै अनुगमनमा पुगेको सरकारी टोलीलाई व्यापारीहरूले अवरोध गर्दै ४ घण्टासम्म थुनेर राखेका थिए । त्यसपछि प्रहरीले कालीमाटी फलफूल तथा तरकारी व्यवसायी संघका अध्यक्ष भरत खतिवडालाई नियन्त्रणमा लिएको थियो ।

व्यापारीले मंगलवार बिहान ७ बजेसम्म चुपचाप तरकारी बेचे । त्यसपछि भने उनीहरू आन्दोलनमा उत्रिएका छन् । कालिमाटीमा तरकारीका थोक बिक्री वितरण बिहान ६/७ बजेअघि नै भइसक्छ ।

मंगलबार मध्याह्न तरकारी बजार पुग्दा आन्दोलनमा उत्रिएका एक व्यापारी भन्दै थिए– ‘बिहान ७ बजेसम्म तरकारी बेचेका थियौं, अहिले बन्द छ ।’

आफूहरूलाई बिचौलिया भनेको भन्दै उनीहरू सञ्चारकर्मीहरूप्रति पनि निकै आक्रोशित देखिन्थे । तपाईंहरूले धेरै मार्जिन राख्नुहुन्छ नि त ! भन्दा कुरा भुइँमा खस्न नपाउँदा एक व्यापारी चर्किए – ‘के को मार्जिन ? हामी पनि किसान हो ।’

एकाथरी व्यापारीले संघका अध्यक्ष खतिवडालाई छाड्नुपर्छ भनेर आन्दोलनको नाटक गरिहँदा केही व्यापारी भने अन्योलमा देखिन्थे ।

‘यो बन्दले हामीलाई धेरै घाटा छ,’ एक व्यापारीले भने – ‘बन्द रे भनेर हामीले सामान पनि मगाएनौं, उनीहरू (आन्दोलन भन्दै उफ्रिने व्यापारीहरू) भने बेचिरहेका थिए ।’ यसरी बिक्री वितरण रोकिँदा आफूहरूलाई निकै घाटा हुने उनको गुनासो थियो ।