काठमाडौं – लन्डनमा अचेल हिंसाका घटनाहरूमा वृद्धि हुन थालेको छ । सोमवार राति ट्युब स्टेसनमा गोलीकाण्ड हुँदा तीनजना घाइते भएका छन् । 

उत्तरपश्चिमी लन्डनको ब्रेन्टस्थित किंग्सबरी रोडमा उक्त घटना भएको थियो । 

प्रहरीले अहिलेसम्म यो घटनाका कुनै पनि आरोपितलाई पक्राउ गर्न सकेको छैन र यसलाई आतंकवादी घटना पनि भनेको छैन । 

स्थानीय समयअनुसार सोमवार राति पौने १० बजे भएको घटनामा आपराधिक समूहको संलग्नताको आशंका गरिएको छ । 

घटनाका प्रत्यक्षदर्शीले बताए, ‘निकै चर्का आवाजहरू आएका थिए । मानिसहरू चिच्याउन र आत्तिन थाले । गोली हान्ने व्यक्ति चिच्याउन थाले र केही व्यक्तिहरू एउटा कारमा भागे । मैले कतिजना थिए देख्न पाइनँ । मैले कारलाई राम्ररी देख्न पाएको भए हुन्थ्यो जस्तो लागिरह्यो ।’

प्रत्यक्षदर्शीले आफ्नो पहिचान खुलाउन चाहेनन् । उनले गोली लागेर घाइते भएका युवकले एम्बुलेन्स बोलाइदेओ भनेको आफूले सुनेको बताए । 

उनले भने, ‘उनी असह्य पीडामा थिए र भुइँमा लडीबुडी गर्दै सहायता मागेका थिए । सबैजना आत्तिएका थिए । प्रहरी अधिकारीहरू घटनास्थलमा पाँच मिनेटभित्र आइपुगेका थिए । स्तब्ध बनाउने घटना थियो । यो ग्याङले गराएको
घटना हो भन्नेमा म ढुक्क छु । ग्याङका सदस्यहरू त्यो ठाउँमा घुमिरहेका हुन्छन् ।’

घटनाको रिपोर्ट पाएपछि प्रहरीका गाडी र एम्बुलेन्सहरू जुबिली लाइन स्टेसनबाहिरको व्यस्त सडकमा आइपुगेका थिए । 

तीस वर्षीया एक महिला र दुई पुरुषलाई गोलीको चोट लागेपछि अस्पताल दौडाइएको थियो । 

दुवै पुरुष अस्पतालमै छन् र उनीहरूलाई घातक चोटपटक लागेको छैन । महिलाले भने अस्पतालबाट छुट्टी पाइसकेकी छन् । 

प्रहरी अधिकारीहरूले आरोपितको खोजी गरिरहेका छन् ।

लन्डनमा केही समययता चक्कुले हान्ने लगायतका हिंसात्मक गतिविधि बढेका छन् ।

एजेन्सी