काठमाडौं –पाकिस्तानका नवनिर्वाचित प्रधानमन्त्री इमरान खानले सरकारी खर्च कटाउने र सादगीपूर्ण प्रधानमन्त्रित्व कायम गर्ने घोषणा गरेको पाकिस्तानी सञ्चारमाध्यमले लेखेका छन् । 

द न्युज डट् कम डट् पीकेमा सोमवार छापिएको एक खबरमा खानले शपथ ग्रहणपछि विश्वका सादगीपूर्ण प्रधानमन्त्रीहरूको नाम लिने क्रममा नेपालका पूर्वप्रधानमन्त्री सुशील कोइरालाको पनि नाम लिएका थिए ।

पूर्वप्रधानमन्त्री कोइरालाले प्रधानमन्त्रीका हैसियतले पाउने सुविधा नलिएको र त्यसका लागि उनको व्यापक प्रशंसा भएको भनी संवाददाता सबिर शाहले लेखेका छन् । 

‘राजनीतिकर्मीहरूले धन कमाउने गरेकोमा सुशील कोइरालाको सम्पत्ति जम्मा तीनवटा मोबाइल फोन रहेको थियो,’ समाचारमा लेखिएको छ । 

समाचारमा बीबीसीलाई उद्धृत गर्दै लेखिएको छ, ‘प्रधानमन्त्री निवास बालुवाटारमा सर्नुअघि सुशील कोइराला काठमाडौंमा भाडाको घरमा बस्नुहुन्थ्यो । उहाँ पहिले पनि काठमाडौं आउँदा होटेलमा बस्नुको साटो भाइको घरमा बसेको बताइन्छ ।’

खानले विश्वका अन्य सादगीपूर्ण नेताको नाम लिने क्रममा उरुग्वेका पूर्वराष्ट्रपति जोसे मुहिका र मलावीकी पहिलो महिला राष्ट्रपति जोएस बान्डाको पनि नाम लिएका थिए ।