काठमाडौं– सामाजिक सञ्जाल फेसबुकमा प्रधानमन्त्री केपी शर्मा ओलीविरुद्ध अनर्गल प्रचार गरी समाजमा भ्रम फैलाएको भन्दै एकजना पक्राउ परेका छन् । 

महानगरीय अपराध महाशाखाको टोलीले भक्तपुरको सूर्यविनायक नगरपालिका ३ घर भएका होमनाथ सिग्देललाई पक्राउ गरेको हो । 

सामाजिक सञ्जाल फेसबुकमा भ्रमपूर्ण, नकरात्मक दृष्टिकोणले अफवाह फैलाउने कार्यमा संलग्न रहेको भन्दै सिग्देललाई पक्राउ गरिएको महानगरीय अपराध महाशाखाका प्रहरी उपरीक्षक नरेन्द्र उप्रेतीले जानकारी दिए । 

पक्राउ परेका सिग्देलविरुद्ध विद्युतीय कारोबार ऐन २०६३ बमोजिम आवश्यक कारबाहीका लागि छानबिन गरिने प्रहरीले जनाएको छ । विद्युतीय स्वरुपमा गैरकानूनी कुरा प्रकाशन गर्ने कार्यमा संलग्न व्यक्तिलाई १ लाख रुपैयाँसम्म जरिवाना वा ५ वर्षको कैद सजाय हुने ऐनमा व्यवस्था छ ।