महेन्द्रनगर – कञ्चनपुरकी बालिका निर्मला पन्तका हत्यारालाई तत्काल सार्वजनिक गर्न माग गर्दै महेन्द्रनगर बजारमा थाल ठटाएर विरोध प्रदर्शन गरिएको छ ।

खाना खाने थाल र चम्चासहित सडकमा उत्रेका महिलाले हत्यारा पत्ता लगाउन ढिलाइ भइरहेको भन्दै सरकारको विरोध गरेका छन् । गोरा र तीजमा स्थगित भएको निर्मलालाई न्याय दिलाउने आन्दोलन फेरि शुरू हुन थालेको छ ।

हत्या आरोपमा पक्राउ परेका दिलिपसिंह विष्टलाई जनदबाब र प्रमाण नपुगेपछि छाडिएको छ भने शंकास्पद बम दिदीबहिनी रोशनी र बबितालाई पनि प्रहरीले छाडेको छ । राष्ट्रिय मानवअधिकार आयोग र उच्चस्तरीय छानबिन समितिले अनुसन्धानमा तत्कालीन प्रहरी टीमले गम्भीर त्रुटि गरेको सार्वजनिक गरेका छन् ।

अनुसन्धानमा गम्भीर त्रुटि गरेको आरोप लागेका प्रहरीमध्ये एसपी डिल्लीराज विष्टलाई सरकारले पहिलो चरणको आन्दोलन उत्कर्षमा पुग्दा निलम्बन गरेको थियो । तर, अरु प्रहरी अधिकारीमाथि सरकारले कुनै कारवाही गरेको छैन ।

अपराधी पत्ता नलाग्नु र प्रमाण नष्ट गर्नेमाथि कारवाही नहुनुले महेन्द्रनगरमा आक्रोश बढ्दै गइरहेको महिला अगुवा हेलन श्रेष्ठले बताइन् । प्रतिपक्षी नेपाली कांग्रेस निकट नेपाल विद्यार्थी संघले बिहीवार साँझबाट घोषित आन्दोलन गर्ने तयारी गरेको नेविसंघ कञ्चनपुरका नेता केशवराज जोशीले बताए ।

यसैबीच, बालिका निर्मला पन्तको हत्याकाण्डका दोषीलाई सरकारले संरक्षण गर्न खोजेको भन्दै सांसदहरूले विरोध जनाएका छन् । प्रतिनिधि सभाको बिहीवार बसेको बैठकको शून्य समयमा सांसदहरूले नक्कली दोषी खोजेर अपराधीलाई लुकाउन खोजेको आरोप लगाएका हुन् । 

कांग्रेसकी हिरा गुरुङले भनिन्, ‘सरकार नै बलात्कारीलाई जोगाउन लागेकोमा शंका गर्नु पर्दैन । अपराधी सत्तासिन पार्टीको पहुँच भएको व्यक्ति हो कि भनेर जनताले भन्न थालेका छन् ।’ 

सांसद सुजाता कोइरालाले निर्मला पन्तको हत्याको २ महिनासम्म पनि दोषी पत्ता लगाउन नसकेको भन्दै सरकारको आलोचना गरिन् । उनले घटना छानबिन समितिको सदस्यले राजीनामा गरेको विषयमा सरकारले सदनलाई जानकारी दिनुपर्ने बताइन् ।

कांग्रेस कोषाध्यक्ष सरिता यादवले सरकार बलात्कार र हत्यामा ध्यान नदिएर लुकाउने कोसिस गरेको आरोप लगाइन् । उनले जबसम्म महिलाको सुरक्षा हुँदैन, देशको सुरक्षा हुन नसक्ने बताइन् ।