काठमाडौं– संसदीय सुनुवाई समितिले अख्तियार दुरुपयोग अनुसन्धान आयोगको प्रमुख आयुक्तमा नवीन घिमिरेको नाम सर्वसम्मतिले अनुमोदन गरेको छ ।

संसदीय सुनुवाई विशेष समितिको बिहीवार बसेको बैठकले घिमिरेको नाम सर्वसम्मत अनुमोदन गरेको हो । उनीविरुद्ध कुनैपनि उजुरी परेका थिएनन् । 

सुनुवाइका क्रममा घिमिरेले भ्रष्टाचार नियन्त्रणका लागि अख्तियारलाई प्रभावकारी बनाउनु पर्ने बताएका थिए । सांसदहरुको प्रश्नको जवाफमा घिमिरेले अख्तियारको विकल्प अख्तियार नै भएको बताएका थिए । 

भदौ २० गते बसेको संवैधानिक परिषद्को बैठकले दुइसाता अघि घिमिरेलाई अख्तियार प्रमुखमा सिफारिश गरेको थियो । 

संसदीय सुनुवाई समितिको अनुमोदनपछि भोलि नै राष्ट्रपति विद्यादेवी भण्डारीले घिमिरेलाई प्रमुख आयुक्त नियुक्त गर्ने तयारी गर्नु भएको छ ।

को हुन घिमिरे ?

वि.सं. २०१२ साल भदौमा जन्मिएका घिमिरे काठमाडौंको सिफलका स्थायी बासिन्दा हुन् ।

जन प्रशासनमा स्नातकोत्तरसम्मको अध्ययन गरेका घिमिरे २०७४ फागुनदेखि अख्तियार दुरूपयोग अनुसन्धान आयोगको प्रमुख आयुक्तका रूपमा कार्यरत छन् । निवर्तमान प्रमुख आयुक्त दीप बस्न्यातले अवकाश पाएपछि घिमिरेले कार्यवाहक प्रमुखका रूपमा अख्तियारको नेतृत्व सम्हाल्दै आएका छन् ।

लामो समय गृह प्रसाशनमा काम गरेका घिमिरे काबिल प्रशासक मानिन्छन् । गृहसचिवबाट अवकाश पाउनुअघि उनले रक्षा, वन तथा भुसंरक्षण मन्त्रालयमा सचिवको जिम्मेवारी सम्हालिसकेका छन् । 

सुरक्षा र प्रशासन क्षेत्रका विज्ञ घिमिरेले आफ्नो जीवनको ३५ वर्षभन्दा बढी समय प्रशासनिक क्षेत्रमा व्यतित गरेका छन् । घिमिरे सुप्रबल जनसेवाश्री पुरस्कारबाट समेत सम्मानित भइसकेका छन् ।