धनगढी – सवारी तथा यातायात व्यवस्था ऐन २०४९ (संशोधित) मा संशोधनको माग राखी सवारी चालक आन्दोलनमा उत्रेपछि यातायात क्षेत्र प्रभावित भएको छ ।

देशभरजस्तै ७ नम्बर प्रदेशमा पनि असोज २ गतेदेखि जारी आन्दोलनले यातायात क्षेत्र ठप्प बनेपछि यात्रु अलपत्र परेका छन् । बझाङ चैनपुरका कमलकुमार जोशी बुधवार हवाई मार्ग हुँदै काठमाडौंबाट धनगढी झरे । तर, चालकको आन्दोलनले बस सेवा अवरुद्ध भएपछि उनी धनगढीमै अलपत्र परेका छन् ।

‘जहाज चढेर धनगढी पुगियो । तर पुग्नुपर्ने गन्तव्यसम्म त फेरि बसकै भर पर्नुपर्छ । यहाँ अलपत्र परियो,’ उनले भने । अछामका कर्ण कार्की भारतको मुम्बईबाट काम गरेर घर फिर्ता हुँदैछन् । तर, यातायात सेवा नै ठप्प भएपछि उनले पनि धनगढी बसपार्कमै अलपत्र परेको दुखेसो सुनाए । उनले भने, ‘के हो ? के हो ? बुझी नसक्नु छ यहाँ । कहिले कसको बन्द त कहिले कसको ।’

चालकको आन्दोलनले लामो तथा छोटो दुरीका सबै सेवा ठप्प छन् । जसले सर्वसाधारण सास्ती खेप्न बाध्य भएका छन् । तर, सवारी चालकले माग पूरा नभएसम्म आन्दोलन जारी राख्ने अडानमा छन् । धनगढी बसपार्कमा भेटिएका बस चालक उद्धवसिंह बिष्ट भन्छन्, ‘कुनै पनि चालक जानीजानी कसैको ज्यान मार्दैन । तर, वर्तमान कानूनले हामीलाई अपराधी बनाएको छ । जुन कारण ऐन संशोधनको माग राखी हामी आन्दोलनमा उत्रिएका हौं ।’

२०७४ सालमा संशोधन भएको सवारी तथा यातायात व्यवस्था सम्बन्धी ऐनमा कसैले सवारी चलाई कुनै मानिसलाई किची, ठक्कर दिई वा कुनै किसिमले सवारी दुर्घटना गराई सवारीमा रहेको सवारी बाहिर जुनसुकै वा सोही ठाउँमा रहे, बसेको कुनै मानिस त्यस्तो दुर्घटनाको कारणबाट तत्कालै चोटको परिणाम स्वरुप २१ दिनभित्र मरेमा त्यस्तो कार्य ज्यान मार्ने मनसाय जन्मकैद हुने मानेको छ । उक्त कसुरको मात्रा अनुसार ५ वर्षदेखि १२ वर्षसम्म कैद हुने प्रावधान छ ।

तर, चालकले वर्तमान कानूनले आफूलाई अपराधी सरह व्यवहार गरेकाले संशोधन नगरेसम्म आफूहरूले सवारी नचलाउने घोषणा गरेको बताएका छन् ।

बसपार्कमा भेटिएका सहचालक रमेश पन्तले वर्तमान ऐनले सवारी चालकलाई अपराधी बनाएको र जन्मकैदसम्मको फैसला गर्ने व्यवस्था गरेकोप्रति आफूहरूको असन्तुष्टि रहेको बताए ।

सवारी चालकले सवारी थन्काएर आन्दोलन शुरू गरेपछि मंगलवारदेखि सार्वजनिक सवारी चलेका छैनन् । सार्वजनिक सवारी नचल्दा सडक सुनसान देखिएको छ ।