रोल्पा-जिल्लामा झोलुङ्गे पुल विस्तारसँगै खोला तर्दा हुने जोखिम घट्न थालेको छ । भौगोलिक बनावटका कारण जिल्लाका अधिकांश ठाडो खोला हुने र त्यहाँ आवतजावत गर्दा जोखिम हुँदै आएको थियो । जिल्ला समन्वय समितिअन्तर्गत झोलुङ्गे पुल सहयोग कार्यक्रमबाट झोलुङ्गे पुल विस्तार भएको हो ।

आवतजावतमा समस्या भोग्दै आएका समुदायलाई प्राथमिकता दिई कार्यक्रम सञ्चालन भइरहेको जिससका सब–इञ्जिनियर तीलक केसीले बताउनुभयो । जिल्लामा हालसम्म २०७ झोलुङ्गे पुल निर्माण भइसकेका छन् । प्रतिपुल निर्माणका लागि रु २५ लाखदेखि रु ४५ लाखसम्म खर्च हुने गरेको छ । ट्रस्टपुल कम लागतमा तयार भए पनि झोलुङ्गे पुलमा अत्यधिक बजेट खर्च भइरहेको केसीले बताउनुभयो ।

पुराना पुल मर्मत र नयाँ निर्माणका लागि समुदायबाट माग आइरहेको केसीको भनाइ छ । हालसम्म सुनछहरी गाउँपालिकामा सबैभन्दा धेरै झोलुङ्गे पुल निर्माण भएको छ । सो गाउँपालिकामा ६० झोलुङ्गे पुल निर्माण भइसकेको छ । यसैगरी दक्षिण रोल्पाको रुन्टीगढी गाउँपालिकामा जिल्लामै कम झोलुङ्गे पुल निर्माण भएको देखिएको छ ।

रुन्टीगढी गाउँपालिकामा हालसम्म जम्मा ६ मात्रै झोलुङ्गे पुल निर्माण भएको बताइएको छ । जिल्लाको दुर्गम भूगोललाई प्राथमिकता दिएर काम गरेका कारण उत्तरपूर्वी रोल्पामा बढी मात्रामा झोलुङ्गे पुल बनेको गैसस विकास सरोकार समाज रोल्पाका अध्यक्ष कर्ण वाँठाले जानकारी दिनुभयो । 

स्थानीय जनताले काठको अस्थायी पुल तथा फड्के बनाउँदा हरेक वर्ष वनजङ्गलको समेत नास हँुदै आएकामा पुल निर्माणले स्थायी समाधान दिनुको साथै जङ्गल विनास हुनबाट समेत जोगिएको बताइएको छ । 

पुल निर्माणपछि सुरक्षित यात्रा गर्न पाएकामा सूर्योदय आधारभूत विद्यालय धवाङ्गका शिक्षक बुद्धीराम केसीले खुशी व्यक्त गर्नुभयो । २० वर्षे जागिर अवधिमा १९ वर्ष खोला तरेरै आवतजावत गरियो, अघिल्लो वर्ष पुल बनेकाले सजिलो भएको छ, केसीले भन्नुभयो । वर्षातको मौसममा निकै चुनौती मोलेर खोला तर्न बाध्य भयौँ, केसीले भन्नुभयो ।

पुल अभावका कारण सोही खोलामा बगेर धेरै मान्छेले ज्यान गुमाएको तथा घाइते भएको केसीको भनाइ छ । हरेक वर्ष स्थानीय जनताले वनका ठूलठूला रुख काटेर फट्के हाल्ने चलन भए पनि त्यसको स्थायित्व नहुनाका साथै वन पनि विनास हँुदै आएको शिक्षक केसीले बताउनुभयो ।