काठमाडौं– १२ वैशाख २०७२ को भूकम्पले कारागार भत्काउँदा जेलबाट भागेर माइला लामा पक्राउ परेका छन् । 

काठमाडौंका शिवबहादुर खड्कालाई जग्गा बेचेको रकम कमिसन नदिएको भन्दै माइला लामालगायत व्यक्तिले १६ वैशाख २०६७ मा अपहरण गरेका थिए । प्रहरीले अपहरणमा परेका खड्कालाई ७ जेठ २०६७ मा रिहा गरी अपहरणमा संलग्न माइलालगायत व्यक्तिविरुद्ध मुद्दा दर्ता गरेको थियो । 

सिन्धुपाल्चोकको ठूलो धादिङ घर भएका माइलालाई पुनरावेदन अदालत ललितपुरले १० वर्ष कैद र ५० हजार जरिवानाको फैसला सुनाएको थियो । 

फैसला कार्यान्वयनका लागि सिन्धुपाल्चोक कारागारमा सजाय मुक्ता गरिरहेका माइला २०७२ सालको भूकम्पले कारागार भत्किँदा जेलबाट फरार भएका थिए । 

जेलबाट भागेर विभिन्न ठाउँमा लुकेर बस्दै आएका माइलालाई प्रहरीको केन्द्रीय अनुसन्धान ब्यूरो (सिआईबी)ले काठमाडौंको माकलवारीबाट पक्राउ गरेको हो ।