सुर्खेत – नेपाली कांग्रेसकी पूर्वकोषाध्यक्ष तथा पूर्वमन्त्री चित्रलेखा यादवले नेपाली कांग्रेसले बनाइरहेको विधान अन्य पार्टीभन्दा लोकतान्त्रिक र समावेशी भएको बताएकी छन् ।

नेपाली कांग्रेसको विधान संशोधन सुझाव संकलनका लागि सोमवार वीरेन्द्रनगरमा भएको प्रदेश स्तरीय भेलामा कांग्रेस नेत्री यादवले कांग्रेस सबैभन्दा पुरानो लोकतान्त्रिक पार्टी भएको बताइन् । 

‘हामी सबैभन्दा लामो इतिहास बोकेको, जनताका पक्षमा काम गर्दै आइरहेको पार्टीका जिम्मेवार कार्यकर्ता हौं,’ उनले भनिन्, ‘अब हामीले बनाउने पार्टीको नयाँ विधानले अन्य दलको भन्दा थप समावेशी र लोकतान्त्रिक आचरण बोक्ने छ ।’

उनले पूर्वमन्त्री यादवले पार्टीलाई बलियो बनाउन सबै नेता कार्यकर्तालाई एकवद्ध भएर अघि बढ्न सुझाव दिएकी छन् । ‘नेपाली कांग्रेसलाई बलियो संगठन बनाउनका निम्ति सबैको सुझाव, सल्लाह अतिआवश्यक रहेको छ,’ उनले भनिन्, ‘पार्टीलाई सुदृढ गर्न आरोप–प्रत्यारोपभन्दा माथि उठेर छलफल गरौं ।’

कांग्रेस नेत्री यादवले पार्टीले तयार गरेको मस्यौदा समितिमाथि विभिन्न समूह बनाएर व्यापक छलफल गरी सुझाव संकलन गरिने बताइन् । ‘सातै प्रदेशबाट मस्यौदामाथि सुझाव संकलन गरेर दशैंतिहारको बीचमा केन्द्रीय समिति बैठकमा प्रस्तुत गर्नेछौं,’ उनले भनिन्, ‘तत्पश्चात् मंसिरमा हुने महासमिति भेलामा प्रस्तुत गर्नेछौं ।’

विधान समितिका सदस्य प्रदीप पौडेलले सबै तहमा एकतिहाई महिला सहभागिता हुने बताए । उनले केन्द्रीय सदस्य र पदाधिकारीको आकार बढ्ने, तहहरू अधिकार सम्पन्न हुने, प्रदेश समिति पनि अधिकार सम्पन्न बनाइने प्रतिबद्धता जनाए ।

समानुपातिक क्षेत्रका आधारमा संख्या थपघट हुने र जनसंख्याका आधारमा संख्या तय गरिने हुँदा सबै प्रदेश समिति फरक–फरक आकारमा रहने उनको भनाई छ । जसअनुसार प्रदेश समिति बढीमा ९० सदस्यीय र घटीमा ३५ सदस्यीय हुने सम्भावना रहेको उनको भनाई छ ।

नेपाली कांग्रेस सुर्खेतका सभापति कमलराज रेग्मीले अहिले पनि अन्य दलभन्दा कांग्रेसको विधान लोकतान्त्रिक भएको र नयाँ बन्ने विधान पनि थप लोकतान्त्रिक हुने उनको भनाइ छ । उनले कार्यक्रमको समापनमा दिइएका सुझाव सार्वजनिक गरिने बताए ।