सुर्खेत-  कर्णाली प्रदेशका मुख्यमन्त्री महेन्द्रबहादुर शाहीले संघीय सरकारको जस्तै मन्त्रालयमा फाईल ल्याएर योजना माग्न आउनेहरु भ्रष्ट भएको आरोप लगाएका छन् ।

दशैंको अवसरमा मन्त्रालयमा आयोजना गरिएको पत्रकार सम्मेलनलाई सम्वोधन गर्दै मुख्यमन्त्री शाहीले ग्रामीण तहका जनताहरु कहिल्यै बजेट माग्न नआउने तर केही टाठा बाठाहरुले बजेटमा भ्रष्टाचार गर्ने उदेश्यकासाथ मन्त्रालयमा लाईन लाग्ने गरेको बताए ।

‘वास्तविक जनतालाई आवश्यकता परेको योजनाका लागि टाठा बाठाहरु योजना माग्न आउँदैनन्’ उनले भने, ‘१५ लाखको योजनाबाट १० लाख खान चाहने भ्रष्टाचारीहरु मात्रै योजना माग्न मन्त्रालयमा धाउने गर्छन् । यो समस्या संघीय सरकारका विभिन्न मन्त्रालयमा पनि छ । बजेट माग्ने र खाने प्रचलनलाई अन्त्य गर्न प्रदेश सरकार प्रतिबद्ध छ ।’

उनले यसरी बजेट माग्न आउनेहरुबाट सरकार, मिडिया सबैले खबरदारी गर्नुपर्नेमा जोड दिए ।

मुख्यमन्त्री शाहीले कर्णालीमा दिन प्रतिदिन पनिर्भरता बढदै गएको बताए । ‘उत्पादन गरेर वर्षमा लाखौं पैसा कमाउन सकिँदैन’ उनले भने, ‘त्यसैले नेपालमा भ्रष्टाचार मौलाएको छ । यसलाई निरुत्साहित गर्न सबै लाग्न जरुरी भइसकेको छ । उत्पादन गरे मात्र पैसा पाइन्छ, नभए कसैले पनि पेसा कमाउन सक्दैन । भ्रष्टाचार गर्न पाईदैन भन्ने पार्नुपर्छ ।’

उनले कर्णाली प्रदेशको विकासका लागि जति पनि पैसा ल्याउन सकिने धारणा राखे । ‘कर्णालीको विकासका लागि जति पनि पैसा ल्याउन सकिन्छ ’ उनले भने, ‘अहिले विनियोजन भएका हरेक योजनाका लागि सञ्चारकर्मीले सुक्ष्म अध्ययन गरिदिनुहोस् र सत्य तथ्य बाहिर ल्याईदिनुहोस् । कारवाही गर्न सरकार तयार छ ।’

मुख्यमन्त्री शाहीले कर्णालीका जनताको गरिब मानसिकतालाई हटाउन सञ्चारकर्मीको महत्वपूर्ण भुमिका हुने बताउँदै जनताको मानसिकता बदल्ने र जनतालाई आशावाद बिनाउने अभियानमा सक्रियतापूवृक लाग्न सञ्चारकर्मीलाई आग्रह गरे ।

उनले कर्णाली प्रदेशका कोही पनि जनतालाइृ भूमिहिन हुन नदिने सरकारले तयारी गरेको बताए । ‘हामी सबैलाई लालपुर्जा दिनछौं ’ उनले भने, ‘तर त्यसकालागि यो वर्ष भूमिहीनहरुको तथ्यांक संकलन गर्ने, नीति बनाउने र प्रदेशलाई भूमिहिन मुक्त बनाउने हाम्रो योजना छ ।’