काठमाडौं–हिन्दू नेपालीको महत्वपूर्ण चाड दशैंको अवसरमा नेपाल प्रहरीले आजदेखि राजधानीका विभिन्न रुटमा बस सञ्चालन गरेको छ । 

दशैंमा राजधानीमा सवारी साधन अत्याधिक न्यून चल्ने भएकाले यात्रुको सुविधालाई मध्यनगर राख्दै बस सञ्चालन गरिएको प्रहरी प्रधान कार्यालयले जनाएको छ । 

प्रहरीले नागरिकको सहजताका लागि आज, भोलि र  पर्सी गरी तीन दिनसम्म निःशुल्क बस सेवा सञ्चालन गर्नेछ ।

प्रहरी प्रधान कार्यालय नक्साललाई केन्द्रबिन्दु बनाएर विभिन्न रुटमा बस सञ्चालित हुने जनाइएको छ । 

प्रहरीका अनुसार नक्साल–पुतलीसडक–माइतीघर–कुपण्डोल–पुल्चोक–जावलाखेल–एकान्तकुना–बल्खु–कलङ्की–कालीमाटी–त्रिपुरेश्वर–शहीदगेट–रत्नपार्क–दरबारमार्ग हुँदै नक्सालसम्मको रुपमा निःशुल्क सेवा दिने बस चल्नेछ ।
त्यस्तै नक्साल–मैतिदेवी–गौशाला–कोटेश्वर–तीनकुने–बबरमहल–माइतीघर–त्रिपुरेश्वर–शहीदगेट–लैनचौर–लाजिम्पाट–नारायणगोपालचोक–बालुवाटार हुँदै पुनःनक्सालसम्मको रुटमा पनि प्रहरीको बस चल्नेछन् । 

यसैगरी नक्साल–जयनेपाल हल–लैनचौर–सोह्रखुट्टे–नयाँबजार–बालाजुचोक–नयाँ बसपार्क–तिलिङ्गेटार–नारायणगोपाल चोक–सुकेधारा चोक–चाबहिल–गौशाला–रातोपुल हुँदै पुनः नक्सालसम्मको रुटमा पनि प्रहरीका बसले सेवा दिनेछन् । 

निःशुल्क बसहरु बिहान ११ देखि अपराह्न ४ बजेसम्म सञ्चालन हुने प्रहरीले जनाएको छ ।

यसैगरी सशस्त्र प्रहरीले पनि मंगलबारदेखि नै दशैंको अवसरमा काठमाडौं उपत्यकामा ४ वटा बस निःशुल्क सञ्चालन गरेको छ भने नेपाली सेनाले विजया दशमीको दिन निशुल्क बस सञ्चालन गर्ने भएको छ ।