सुर्खेत– शनिबार दिउँसो कालीकोटको भत्ताबाट आएका रेशम शाही बसपार्कमा झरे । उनी जानु थियो वीरेन्द्रनगरकै भैरवस्थान । शाही बसबाट ओर्ले र मंगलगढी चोकचर्फ अघि बढे । मंगलगढी चोक पुग्नु अगाडि ठूलो नाला जस्तो पानी जमेको दृश्य देखियो । उनी नजिकै गए तर उनले दुवै हातले नाक र मुख च्याप्दै वाक्वाकी लगाउँदै उक्त बाटो पार गरे ।

वीरेन्द्रनगर वडा नं. ६ मा बस्दै आएकी रिता कार्कीलाई नेपालगञ्ज जानु थियो । उनी हतारमा भएका कारण अटोरिक्साबाट मंगलगढी चोकमा झरिन् र बसपार्कबाट तर्फ पैदल हिँडिन् । उनले सारी लगाएकी थिइन् । नालासहित दिशा बगिरहेको स्थानमा उनको सारी लत्त्रियो । उनी फेरि अटोरक्सिामा फर्केर घर गइन् र सहयोगीलाई भनेर बसको टिकट फिर्ता गर्न लगाइन् । उनी भन्दै थिइन् ‘यो कस्तो राजधानी हो ?’

वीरेन्द्रनगरको मुटु मंगलगढी चोकको दुर्दशा हो यो । विगत ६ महिना भन्दा पहिलेदेखि नै उक्त चोकमा दिशा र फोहोर बगिरहेको छ । जो सुकै यात्रु आएपनि बसपार्क जान उक्त बाटो क्रस गर्नपर्छ । जो व्यक्ति उक्त बाटोबाट यात्रा गर्छ उसले स्थानीय र प्रदेश सरकारलाई गाली गरेर जाने गर्छ । 

गाली नगरुन पनि किन ? जनताले विकास र समृद्धिको नारा लगाउने दलहरुबाट मंगलगढी चोक जस्तो राजधानीको महत्वपूर्ण स्थानमा यस्तो अवस्था आउनु दुर्भाग्यपूर्ण नै हो । स्थानीय लालबहादुर सिजापती राजनीतिक नेतृत्व जस्तै शहर पनि फोहोर भएको बताउँछन् । नेमकिपाका जिल्ला नेतासमेत रहेका सिजापतिले दलहरुको समृद्धि यस्तै भएको आरोप लगाए । 

‘राजनीतिक दलहरू जनताका चाहना, विकास निर्माण र समृद्धिको यात्रामा लाग्लान भन्ने नठान्नुस ।’ सरकारललाई आरोप लगाउँदै उनले भने, ‘आदर्शका गफ गर्दैमा कहि कतै विकास हुँदैन । विकास भन्ने कुरा व्यवहारमा देखाउनुपर्छ ।’ दैलेख घर भएका युवा सन्देश कठायतले प्रदेश सरकार र नगरपालिकाका जनप्रतिनिधि दिनहुँ यो बाटो मोटरमा हुँइकिने भएका कारण उनीहरुलार्ई वास्तविकता थाहा नभएको बताए । 

‘जतापनि फोहोर छ । फोहोरको सवालमा त जनताले आँखा चिम्लेका छन् ।’ उनले भने, ‘तर दिशा नै सडकमा बगेको देखेर पनि केहि गर्न नसक्ने नेतृत्वलाई निरीह नेतृत्व बाहेक अरु के नै भन्न सकिन्छ र ?’ उनले सरकारले कम्तिमा प्रदेशको राजधानी बनाउन पहल गर्नुपर्नेमा जोड दिए । ‘अन्य विकास पछि गरौंला ।’ उनले भने, ‘कम्तिमा बसपार्कमा निस्केको दिसा त लुकाइदेउ ?’

बारम्बार स्थानीय पसल सञ्चालकहरुले नगरपालिकाको ध्यानाकर्षण गराएपनि सुनुवाइ हुन नसकेको उनीहरुको भनाई छ । ‘हामीले नगरपालिका, फोरलेन सडक निर्माण व्यवसायी, प्रदेश सरकारका मन्त्रीलाई समेत यो ढल निकासका लागि पहल गरिदिन आग्रह गरेका थियौं ।’ नाम नबताउने शर्तमा एक जना व्यापारीले भने, ‘तर कोही कसैबाट सुनुवाइ हुन सकेन ।

आजभोलि त हामीलाई उक्त नालाबाट आउने गन्ध पनि बास्ना झैं लाग्न थालिसक्यो ।’ उनले गन्ध आयो भनेर पसलमा व्यापार गर्न पनि छोडन नमिल्ने, सरोकारवालाले सडकमा नाला बनाइ ढल निकासको सहि व्यवस्थापन पनि गर्न नसक्ने बाध्यता आइलागेको दुखेसो पोखे । यससम्बन्धमा वीरेन्द्रनगर नगरपालिकाका नगरप्रमुख देवकुमार सुवेदीलाई फोन गरेर बुझन खोज्दा उनको फोन उठेन ।