काठमाडौं — अमेरिकाको क्यालिफोर्निया राज्यको उत्तरी क्षेत्रमा रहेको एक शहरमा डढेलोका कारण ध्वस्त भएका भग्नावशेषमा पीडितहरूलाई नेसनल गार्डका सैनिकहरूले खोजिरहेका छन् । 

डढेलोमा परी मृत्यु हुनेको संख्या ५६ पुगिसकेको छ । क्यालिफोर्नियाको इतिहासमा यो सबभन्दा घातक र विनाशक डढेलो हो । 

प्याराडाइज नामक शहरमा डढेलोले अत्यधिक असर पारेको हो । 

अधिकारीहरूले सार्वजनिक गरेको सूचीमा १३० जना हराइरहेका छन् । तीमध्ये धेरैजना ६५ वर्षभन्दा माथिका छन् । 

क्याम्प फायर नाम दिइएको डढेलोमा परी लगभग २३० जना हराइरहेको शुरूमा बताइएको थियो । फेला नपरेका धेरैजसो प्याराडाइज शहरका हुन् । त्यहाँ पहिले २७ हजार मानिस बस्थे । 

प्याराडाइजमा र त्यसवरपर ८९ सय घर तथा भवन ध्वस्त भएका छन् अनि लगभग ५० हजार मानिस उक्त क्षेत्र छोडेर गएका छन् । 

डढेलोमा बाँचेकाहरूलाई नोरोभाइरसले सताएको छ । यो भाइरसले पेटमा ज्वरो फुटाउँछ । चिको शहरमा शिविरमा बसिरहेका २०० मानिसमा भाइरस फैलिएको छ । 

सार्वजनिक स्वास्थ्य निकायकी प्रवक्ता लिसा अल्मागुएरले कम्तीमा २० जनालाई भाइरसले समातेको हुनसक्ने बताइन् ।

रोयटर्सबाट