काठमाडौं – एनआईसी एसिया बैंक लिमिटेडले लाइफ इन्स्योरेन्स कर्पोरेसन (नेपाल) लिमिटेडसँग बैंकएस्योरेन्स सम्झौता गरेको छ ।

सम्झौता अनुसार अब बैंकका ग्राहकले मुलुकभर फैलिएको २ सय ६५ वटै शाखाहरुबाट सहज रुपमा लाइफ इन्स्योरेन्स कर्पोरेसन (नेपाल) लिमिटेडको जीवन बीमा पोलिसी खरिद गर्न सक्ने छन् ।

सम्झौतापत्रमा बैंकको तर्फबाट बैंकका कायममुकायम प्रमुख कार्यकारी अधिकृत रोशनकुमार न्यौपाने र इन्स्योरेन्स कम्पनीको तर्फबाट कार्यवाहक प्रमुख कार्यकारी अधिकृत अभिजित घोष दस्तिदरले हस्ताक्षर गरेका छन् ।

बैंकलाई आम जनमानसले गरेको प्रगाढ विश्वास, अगाध स्नेह र बैंक प्रतिको भरोसाले गर्दा मुलुकभर २६५ शाखा कार्यालयहरु, २७० एटिएम, ३७ वटा एक्सटेन्सन काउण्टर एवं १८ वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गर्ने मुलुककै सबैभन्दा ठूलो शाखा सञ्जाल भएको बैंक हुन सफल  भएको छ । 

बैंकको वासलातको आकार २१० अर्ब रुपैयाँभन्दा बढी पुगेको छ भने कुल निक्षेप करीब १ सय ७१ अर्ब रुपैयाँ तथा कर्जा १ सय ४२ अर्ब रुपैयाँ पुगेर निजी क्षेत्रबाट स्थापित बैंकमध्ये नेपालको सबैभन्दा ठूलो बैंकको रुपमा आफ्नो पहिचान बनाउन सफल भइसकेको छ । 

हालसम्म बैंकमा ग्राहकको संख्या करीब १३ लाख ५० हजार रहेको छ । संस्थागत सुशासन, जोखिम व्यवस्थापन र आन्तरिक नियन्त्रण प्रणालीको उत्कृष्ट अभ्यासलाई बैंकले पालना गर्दै आएको छ ।